Taldyqorǵanda 100-ge jýyq kólik ıesi merekelik avtosherý uıymdastyrdy

TALDYQORǴAN. QazAqparat - Taldyqorǵandyqtar bıylǵy Konstıtýtsııa kúnin erekshe atap ótti. Qala jastary birigip, úlken avtosherý uıymdastyrdy, dep habarlaıdy QazAqparat tilshisi.

Qalanyń kóshelerimen sap túzegen kólikter sany 100-ge jýyqtady. Bmv, Leksýs, Mersedes, Lada, Folksvagen golf klýbtarynyń bul bastamasyna basqa da kólik ıeleri qýana qosyldy. Kók baıraqty jelbiretken kerýen «Jastar» saıabaǵynda ornatylǵan bıik týdyń janynda máre syzyǵyn kesti. Konstıtýtsııa kúnin jetisýlyqtar sán-saltanatymen dál osy «Jastar» saıabaǵynda atap ótti. Ata zańymyzdyń tarıhy arnaıy qoıylymda kórsetildi. Onda Qasym hannyń qasqa joly, Esim hannyń eski joly, Táýke hannyń jeti jarǵysy jáne Kereı men Jánibek handar qurǵan Qazaq handyǵynyń tarıhy qysqasha baıandaldy.

Sondaı-aq oblystyq fılarmonııa ánshileri patrıottyq ánder shyrqady. Berekeni dáriptegen mereke halyqtyń kóńilin jadyratyp, rýhyn asqaqtatty.