Taldyqorǵanda bir kúnde 8 quqyq buzýshy ustaldy

TALDYQORǴAN. KAZINFORM — Jetisýlyq polıtseıler jarty táýlik ishinde qoǵamdyq tártipti buzǵan 8 adamdy anyqtady, dep habarlaıdy Polisia.kz.

Olar mas kúıinde bolyp, qoǵamdyq oryndarda ótip bara jatqan adamdarǵa til tıgizip, arandatýshylyq áreketter jasap, qoǵamǵa jat minez-qulyq tanytqan.

— Jedel basqarý ortalyǵy — qalanyń qaýipsizdigin qamtamasyz etýdegi mańyzdy qurylymdardyń biri. Táýlik boıy júrgiziletin beınemonıtorıng, patrýldik polıtsııa jasaqtaryna jedel aqparat joldaý jáne jedel áreket etý quqyq buzýshylyqtardyń aldyn alyp, olardyń aýyr saldarǵa ulasýyna jol bermeýge múmkindik beredi. Baqylaý júıesi qalanyń ortalyq kóshelerin ǵana emes, turǵyn alaptardy da tolyq qamtıdy, — delingen aqparatta. 

Ortalyq operatorlary men patrýldik polıtsııa qyzmetkerleriniń úılesimdi, ári jedel is-qımylynyń nátıjesinde quqyq buzýshylar der kezinde anyqtalyp, qoldanystaǵy zańnama talaptaryna sáıkes ákimshilik jaýapkershilikke tartyldy.

— Polıtsııa qyzmetkerleri qala turǵyndary men qonaqtaryn qoǵamdyq oryndarda tártip talaptaryn saqtaýǵa shaqyrady. Spırttik ishimdikterdi shamadan tys paıdalaný jáne agressıvti minez-qulyq quqyqtyq jaýapkershilikke ákelýi múmkin, — dep qosty agenttik.

Aıta keteıik, Taldyqorǵanda qylmystyq top adamdarǵa psıhologııalyq qysym jasap, aqsha talap etken.