Taldaý mektebine ótinimder qabyldaý bastaldy
Jańa joba Senat janyndaǵy Jas sarapshylar klýbynyń bastamasymen qolǵa alynyp otyr. Kezekti otyrystardyń birinde Klýb músheleri memlekettik basqarýdaǵy taldaý tásilderin, gýmanıtarlyq zertteýlerdi jáne BAQ-ty kúsheıtý qajet ekenin aıtyp, jas mamandardyń taldaý daǵdylaryn qalyptastyrýǵa arnalǵan qoǵamdyq jobany iske asyrýdy usynǵan edi. Senat Tóraǵasy Máýlen Áshimbaev sarapshylardyń bul bastamasyna qoldaý bildirdi.
Senat Spıkeri Mektep aıasynda jas mamandar sapaly taldaýlar júrgizip, osy baǵyttaǵy qabiletterin shyńdaýǵa mol múmkindik alatynyn atap ótti.
«Bul joba, eń aldymen, taldaý materıaldaryn daıyndaýda belgili bir tájirıbesi bar jáne óz qabiletterin arttyryp, jańa tásilderdi meńgergisi keletin jas zertteýshiler men sarapshylar úshin paıdaly bastama. Sol arqyly olar óz daǵdylaryn memlekettik organdardaǵy sapaly taldaýlarǵa qoıylatyn talaptarmen salystyryp teksere alady. Mektepte dáris oqý úshin qazaqstandyqtarmen birge sheteldik mamandardy da jumyldyrý kózdelip otyr. Osyndaı tyń bastamalar jas mamandardyń jumysyna tyń serpin beredi dep senemiz», – dedi Máýlen Áshimbaev.
Joba seriktesteriniń qatarynda birqatar joǵary oqý oryndary bar. Mektepte oqytý dárister, trenıngter jáne sheberlik sabaqtary formatynda júrgiziledi.
Dáriskerler men tálimgerler qatarynda qazaqstandyq jáne sheteldik belgili analıtıkter bolady. Taldaý mektebiniń jumysy 2022 jyldyń qańtar aıynda Nur-Sultan qalasynda bastalady.
Іrikteý kezinde buǵan deıin taldaý qurylymdarynda, memlekettik basqarý júıesinde, ulttyq kompanııalarda, ǵylymı ınstıtýttarda jáne BAQ-ta jumys istegen kandıdattarǵa basymdyq beriledi.
Ótinimderdi qabyldaý 2021 jyldyń 10 jeltoqsanyna deıin júrgiziledi. Konkýrs boıynsha tolyq aqparatty Parlament Senatynyń saıtynan jáne Palatanyń áleýmettik jelilerdegi paraqshalarynan alýǵa bolady.