Talapkerler eGov.kz portalynda bilim berý granttaryna ótinim bere alady
ASTANA. KAZINFORM – 13 shildeden bastap Qazaqstanda bilim berý granttaryn taǵaıyndaý konkýrsyna qatysý úshin ótinim qabyldaý bastalady.
Talapkerler ótinimderdi elektrondyq úkimet portaly eGov.kz arqyly onlaın formatta tapsyra alady. Qabyldaý ýaqyty 13 shilde kúni saǵat 09:00-de bastalyp, 20 shilde kúni saǵat 18:00-de aıaqtalady.
2024 jyly konkýrsqa qatysý úshin 104 myńnan astam ótinim kelip túsken. Onyń ishinde 5 myńnan astamy eGov.kz portaly arqyly jiberildi. Bul – talapkerlerdiń onlaın formatqa degen qyzyǵýshylyǵynyń artyp kele jatqanynyń kórsetkishi.
Elektrondyq úkimet portaly arqyly ótinim berý úshin talapkerler aldyn ala birqatar qujatty daıyndaýy qajet. Ótinimge kelesi qujattardyń tsıfrlyq kóshirmeleri qosa tirkelýi tıis: bilim týraly qujat (attestat nemese dıplom), 3h4 formatyndaǵy fotosýret, sondaı-aq qajet bolǵan jaǵdaıda dárigerlik-konsýltatsııalyq komıssııanyń qorytyndysy.
Qyzmet sheńberinde jekelegen sanattaǵy stýdentter úshin áleýmettik qoldaýǵa ótinim berý múmkindigi de qarastyrylǵan. Mundaı jaǵdaıda tıisti mártebeni rastaıtyn qujattar – mysaly, ata-anasynyń qaıtys bolǵany týraly kýálik, múgedektik týraly anyqtamalar, jetim mártebesin rastaıtyn qujattar jáne Qazaqstan zańnamasynda kózdelgen ózge de qujattar usynylýy tıis.
Qyzmetti alý úshin paıdalanýshyǵa kelesi qadamdardy oryndaý qajet:
– eGov.kz portalyna kirip, avtorızatsııadan ótip, «Azamattarǵa» – «Bilim berý» – «Joǵary bilim» bólimin tańdaý;
– «Bilim berý granttaryn taǵaıyndaý, sondaı-aq joǵary jáne (nemese) joǵary oqý ornynan keıingi bilim berý uıymdarynda bilim alýshylarǵa áleýmettik qoldaý kórsetý» qyzmetin tańdaý qajet;
– «Qyzmetke onlaın tapsyrys berý» batyrmasyn basý kerek;
– barlyq mindetti joldy toltyryp, ótinimdi qol qoıýdyń qoljetimdi ádisteriniń birimen rastaý;
– jeke kabınettegi «Qyzmetterdi alý tarıhy» bóliminde ótinimdi óńdeý týraly habarlamamen tanysý. Habarlama kórsetilgen merzimde jiberiledi.
Qyzmet kórsetý nátıjesi – bilim berý grantyn taǵaıyndaý týraly elektrondyq kýálik. Qujat elektrondyq formatta beriledi jáne 2025 jylǵy 5 tamyzdan keshiktirilmeı eGov.kz portalyndaǵy jeke kabınette qoljetimdi bolady.
Ótinimder aǵynyn birkelki bólý jáne paıdalanýshylarǵa yńǵaıly bolý úshin eGov.kz portalynda kútý paraǵy jańa fýnktsııasy iske qosyldy. Bul júıe paıdalanýshylardy elektrondyq kezekke tirkep, ótinim berý qyzmetin kezekpen usynady – paraqty jańartýdyń qajeti joq.
Sonymen qatar SMS-habarlamalar júıesi de kózdelgen: ótinim berý kezinde paıdalanýshy «Kezektiń jaqyndaýy týraly SMS-habarlama jiberý» jalaýshasyn belgileı alady. Paıdalanýshynyń kezegi jaqyndaǵan kezde 1414 qysqa nómirinen tirkelgen uıaly telefon nómirine habarlama jiberiledi. Eger nómir mobıldi azamattar bazasynda tirkelmegen bolsa, júıe ony engizýdi usynady.
Qyzmetke sátti qol jetkizý úshin ótinim bermeı turyp braýzer betin jappaý nemese jańartpaý mańyzdy.
Qyzmet QR Tsıfrlyq damý, ınnovatsııalar jáne aeroǵarysh ónerkásibi mınıstrliginiń Memlekettik kórsetiletin qyzmetter komıteti, «Ulttyq aqparattyq tehnologııalar» AQ jáne Qazaqstan Respýblıkasynyń Ǵylym jáne joǵary bilim mınıstrligi arasyndaǵy yntymaqtastyq aıasynda iske qosylyp, jańǵyrtyldy.
Eske sala keteıik, buǵan deıin E-archive platformasy iske qosylatynyn jáne elimizdegi arhıv qujattardyń 25%-y elektrondyq formatqa kóshiriletinin habarlaǵan edik.