Taksı qyzmetine qatysty túzetýler kóleńkeli naryqty ulǵaıtady - qaýymdastyq

ASTANA. QazAqparat - Qazaqstannyń taksı qyzmetteri respýblıkalyq qaýymdastyǵynyń tóraǵasy Medet Qurmanov Senatta qaralyp jatqan taksısterge qatysty túzetýler kóleńkeli naryqty ulǵaıtýy múmkin ekenin eskertti. Bul týraly QazAqparat «Atameken» UKP silteme jasap habarlaıdy.

Jańa túzetýlerge sáıkes taksı qyzmetin ınternet-platformany paıdalana otyryp júzege asyratyn jeke tulǵalardy tasymaldaýshy dep tanyǵan jaǵdaıda taksıdiń kóleńkeli naryǵy ulǵaıyp ketpek.

Qazirgi kezde osy qyzmetterdi «Avtomobıl kóligi týraly» zańdy buza otyryp, jeke tulǵalar ınternet-platformalardy paıdalana otyryp kórsetip jatyr.

«Osy túzetýlerge qatysty birqatar suraq bar. Mysaly, BUS LANE kompanııasy – kez-kelgen jeke tulǵa taksı qyzmetimen aınalyspasa da habarlama arqyly avtobýs jolaǵymen júre alady. Internet-platformalar júrgizýshiler - jeke tulǵalarǵa jolaýshylardan alynatyn tólemderdi qolma-qol aqshasyz tóleýdi qalaı júzege asyrady? Qazir júrgizýshilerdi ınternet-platformalarǵa tartyp, tirkeıtin jáne júrgizýshilerge tólemderdi óz komıssııasyn ustap, júzege asyratyn taksoparkter bar. Bul taksoparkter mashınalardy tehnıkalyq baıqaýdan ótkizý jáne júrgizýshilerdi medıtsınalyq tekserý boıynsha qarapaıym qaýipsizdik talaptaryn saqtamaıdy», – dep atap ótti Qazaqstannyń taksı qyzmetteri respýblıkalyq qaýymdastyǵynyń tóraǵasy Medet Qurmanov.

Eske salsaq, ótken apta Eńbek mınıstrliginde ótken jıynda taksı qyzmetine qatysty zańnamaǵa qandaı ózgertýler engizý josparlanyp otyrǵany talqylandy.

Jalpy Qazaqstan TMD-da taksı baǵasy eń qymbat elderdiń qatarynda.