Taılandtaǵy týrnırde Qazaqstan quramasy ekinshi altyn medal aldy

ASTANA. KAZINFORM - Taıland astanasy Bangkok qalasynda ótip jatqan Futures Cup halyqaralyq týrnırinde el quramasy qorjynyna ekinshi altyn tústi.

Otandasymyz Dosjan Jumaqan (60 keli) fınalda taılandtyq Sıva Chaınarongty qapy qaldyrdy.

Qazaqstandyq bylǵary qolǵap sheberi fınalǵa deıin kenııalyq Felıks Onıango, gvatemalalyq Lıonel Ernandes, ózbekstandyq Bobomýrad Boımırzaev, slovakııalyq Krıstıan Harasnık, frantsııalyq Davıd Harýtıýıandy orta jolda qaldyryp ketti.

Aıta keteıik, Dosjan 2025 jylǵy jasóspirimder arasyndaǵy jazǵy Azııa oıyndarynyń chempıony sanalady.

Eske salsaq, budan buryn el quramasynan Aıdana Ýbaıdýllaqyzy (80 keli) chempıon atandy.

Endi el quramasynan Kamıla Ospanova (70 keli), Bıbarys Áshirbaı (70 keli), Jalǵas Ótebekov (90 keli), Vladıslav Samojonov (90 keliden joǵary) fınalda sharshy alańǵa shyǵady.

Qazaqstan quramasy sapynan fınalǵa segiz sportshy shyqty. Bul jóninen ulttyq qurama ekinshi orynda tur. El quramasynan on bir sportshy jartylaı fınalda jekpe-jek ótkizdi. Olardyń 8-i jeńiske jetse, 3-eýi qarsylasyna ese jiberdi.

Al kósh basyndaǵy Ózbekstan – 9, úshinshi oryndaǵy AQSh – 5 boksshyǵa senim bildirse, odan keıin Úndistan – 4, Ýkraına – 3, Frantsııa, Japonııa – 2, Anglııa, Italııa, Qyrǵyzstan, Grýzııa, Samoa, Tývalý, Taıland 1 úzdigine úmit artady.

Sondaı-aq el quramasynan Aqnur Tursynǵalı (57 keli) Zarına Tolybaı (75 keli), Nursultan Qystaýbaı (85 keli) qola júldeger atandy.

Fınaldyq jekpe-jekter 15 naýryzǵa belgilengen.