Taılandta quldyqta bolǵan eki qazaqstandyq elge kele jatyr

ASTANA. KAZINFORM – Taılandqa jumys isteýge baryp, quldyqqa túsken eki otandasymyz (áıelder) elge oralýda. Bul týraly Syrtqy ister mınıstrliginiń resmı ókili Aıbek Smadııarov málim etti.

«Bıyl qańtarda men Qazaqstannyń azamatymyn, Djýnglıdiń ishindemin, qaıda ekenimdi bilmeımin dep kómek suraǵan habarlama tústi. Azamat eńbek quldyǵyna túskenin aıtyp, bizden kómek surady. Anyqtalǵandaı, bizdiń eki azamatymyz «Altyn úshburysh» aýmaǵynda aldanǵan. Eń qyzyǵy, ekeýiniń de joǵary bilimi bar jáne birneshe til biledi», - dedi Aıbek Smadııarov vedomstvoda ótken baspasóz máslıhatynda.

Onyń aıtýynsha, eki otandasymyz Taılandqa jumys isteýge barǵan.

«Quldyqqa túsken eki qazaqstandyqtyń árqaısysynan 10 myń dollar talap etken. Jergilikti bılikpen kelisimge kelip, bir aı degende eki azamatymyzdy qutqardyq. Qazir olar Qazaqstanǵa ushaqpen kele jatyr», - deıdi ol.

Buǵan deıin SІM ókili sońǵy eki jylda Taılandpen shekaralas Mıanma jáne Laos aýmaqtarynda 200-ge jýyq Qazaqstan azamatynyń eńbek quldyǵyna túskeni týraly málimdegen edi.