Taıland premer-mınıstri etıkalyq daýdan keıin qyzmetinen ýaqytsha shettetildi
BANGKOK. KAZINFORM – Taıland Konstıtýtsııalyq soty premer-mınıstr Paetongthan Shınnavatrany Kambodjanyń burynǵy premer-mınıstri jáne qazirgi Senat tóraǵasy Hýn Senmen telefon arqyly sóıleskennen keıin týyndaǵan daý aıasynda qyzmetinen ýaqytsha shettetti, dep jazdy Anadoly.
Buǵan deıin 36 senator Shınnavatrany bul áńgime kezinde etıkalyq normalardy buzdy dep aıyptady. Sotqa joldanǵan petıtsııada sóılesý mazmuny úkimet basshysyna degen senimdi álsiretetini aıtylǵan.
Konstıtýtsııalyq sot bul ótinishti qarap, premer-mınıstrdi ýaqytsha qyzmetinen shettetý týraly sheshim qabyldady: 7 sýdıa – qoldap, 2 sýdıa – qarsy daýys berdi.
Jarııalanǵan áńgime
BAQ-ta Shınnavatra men Hýn Sen arasyndaǵy 17 mınýttyq telefon áńgimesiniń aýdıojazbasy jarııalandy. Onda úkimet basshysy Hýn Senge «aǵa» dep sóılep, taı armııasynyń bir qolbasshysyn ornynan ketirgisi keletinin aıtady.
Jazba jarııalanǵannan keıin bıliktegi koalıtsııanyń ekinshi iri partııasy — Bhumjaithai alıanstan shyǵatynyn málimdedi. Partııa bul áńgimeniń «Taılandtyń egemendigine, qaýipsizdigine jáne armııasyna nuqsan keltirgenin» aıtty.
Qoǵam tarapynan Shınnavatranyń otstavkasyn talap etken úndeýler kúsheıgen soń, ol keshirim surap, bul sóıleý máneri «kelissóz júrgizý taktıkasy» bolǵanyn, al negizgi maqsaty — eki el arasyndaǵy beıbitshilikti nyǵaıtý bolǵanyn túsindirdi.
Taıland pen Kambodja arasyndaǵy shekaralyq shıelenis
Ońtústik-Shyǵys Azııadaǵy kórshi elder Taıland pen Kambodjany 817 shaqyrymdyq qurlyqtyq shekara bólip jatyr. Bul elder uzaq ýaqyttan beri terrıtorııalyq daýlarmen betpe-bet kelip otyr.
28 mamyrda eki tarap arasynda shekara kelisimderin buzdy degen aıyptaýlar aıasynda qysqa merzimdi qarýly qaqtyǵys oryn aldy.
Keıinirek eki eldiń áskerı basshylyqtary janjaldy beıbit jolmen sheshý týraly kelisimge keldi.
Taıland Kambodjamen shekaradaǵy barlyq baqylaý-ótkizý beketteri Bangkoktaǵy ortalyq úkimettiń baqylaýynda bolatynyn habarlady.
Kambodja premer-mınıstri Hýn Manet óz eliniń Taılandpen terrıtorııalyq daýdy sheshý úshin BUU Halyqaralyq sotyna (HS) júgingenin málimdedi.
Eske sala keteıik, Taıland stýdenti «Álem arýy-2025» baıqaýynda jeńiske jetkenin jazǵan edik.