Taıland premeri HAMAS 12 tutqyndy bosatqanyn málimdedi

Taıland premer-mınıstri Settha Thavısın Gaza sektorynda qamaýda ustalyp otyrǵan atalǵan eldiń 12 azamaty erkindikke jiberilgenin málim etti. Kazinform bul týraly TASS-qa silteme jasap habarlaıdy.

«Qaýipsizdik qyzmetteri men syrtqy ister mınıstrligi tutqynǵa alynǵan 12 taılandtyq bostandyqqa jiberilgenin rastady», – dep jazdy Settha Thavısın X (Twitter) áleýmettik jelisinde.

Adamdardy HAMAS radıkaldy tobynyń músheleri urlap áketkeni aıtylǵan.

Eske salaıyq, Palestınalyq HAMAS toby 7 qazan kúni Izraılge shabýyl jasap, mýzykalyq festıval ótip jatqan jerden kóptegen adamdy kúshtep áketken bolatyn. Tutqynǵa alynǵandar arasynda Qytaı men Taıland azamattary da bar ekeni aıtyldy. Izraıldiń deregine súıensek, HAMAS sol kúni Gaza sektoryna 203 adamdy kepilge áketti.

22 qarashada Izraıl men HAMAS tutqyndardy bosatýǵa, soǵysty ýaqytsha toqtatýǵa keliskenin jazǵan bolatynbyz. Búgin, 24 qarashada bul bitim kúshine engeni jarııalandy. Kelisimge sáıkes, oq atýǵa úzilis tórt kúnge sozylady. Osy ýaqyt ishinde kepilge alynǵan 50 ızraıldik pen 150 palestınalyq tutqyn bosatylady. Sondaı-aq Gazaǵa gýmanıtarlyq kómekter jetkiziledi dep kútilgen.

Tutqyndardyń alǵashqy legi juma kúni bosatylatyny da málim etilgen edi.