Taǵy bes sheteldik azamat Neo Nomad vızasyn aldy
ASTANA. KAZINFORM — Byltyr qarasha aıynan bastap iske qosylǵan Neo Nomad vızasyn taǵy bes sheteldik azamat aldy. Onyń úsheýi — AQSh, bireýi Ulybrıtanııa jáne taǵy bireýi Latvııa azamaty.
Bul týraly Týrızm jáne sport mınıstrliginiń baspasóz qyzmeti málim etti.
— Neo Nomad vızasy sheteldik azamattarǵa Qazaqstanda bir jylǵa deıin turýǵa múmkindik beredi. Bul rette olar sheteldegi kompanııalarda qashyqtan jumys isteı alady. Vıza IT, marketıng, qarjy, dızaın jáne konsaltıng salalaryndaǵy jumysyn saıahatpen ushtastyratyn zamanaýı kóshpendilerge arnalǵan, — delingen mınıstrlik taratqan habarlamada.
Ol úshin sheteldik azamattar Qazaqstan Respýblıkasynyń sheteldegi elshilikterine birneshe qujat tapsyrý qajet:
- Keıingi 6 aıdaǵy bank shotynan úzindi kóshirme, aı saıynǵy tabysy 3 000 AQSh dollarynan joǵary ekenin rastaıtyn qujat;
- Azamattyǵy bar eldiń ýákiletti organy bergen salyq deklaratsııasy;
- Azamattyǵy nemese turaqty mekenjaıy bar eldiń organy bergen sottalmaǵany týraly anyqtama;
- Vızanyń qoldanylý merzimine deıin jaramdy medıtsınalyq saqtandyrý;
- Qazaqstandaǵy týrıstik kompanııalardan shaqyrý (48 eldiń azamaty úshin talap etilmeıdi).
Esterińizge sala keteıik, buǵan deıin Neo Nomad vızasyn úsh sheteldik týrıst alǵan edi. Vızany birinshi bolyp energetıka salasynda jumys isteıtin Ulybrıtanııa azamaty ıelendi. Sondaı-aq vızalar Ońtústik Koreıa jáne Sıngapýr azamattaryna berildi.
Buǵan deıin qazaqstandyq Neo Nomad vızasyn qansha shetel azamaty alǵanyn jazǵan edik.