Taekvondoshy Samırhon Ababakırov: Úlken jeńistermen qýantqym keledi
ASTANA. KAZINFORM — Kazinform tilshisi XXXII Dúnıejúzilik Ýnıversıada oıyndarynda chempıon atanǵan qazaqstandyq taekvondoshy Samırhon Ababakırovty áńgimege tartqan edi.
— Samırhon, seni joǵary tabysyńmen quttyqtaımyn. Jarys barysynda ózińdi qalaı sezine bildiń? Qarsylastaryńdy zertteı aldyń ba?
— Sportshy árbir jarysqa daıyndyqpen attanady. Ol úshin qanshama ter tógýge týra keledi. Men de sol joldan óttim. Dúnıejúzilik dodada aldyma úlken maqsat qoıdym. Bapkerlerdiń aqyl-keńesine qulaq astym. Olardyń taktıkasyn oryndaýǵa tyrystym. Árbir qarsylasymmen jekpe-jekte senimdi oıyn kórsetýge kóńil bóldim.
Dese de eshqaısysy maǵan ońaıǵa soqqan joq. Olardyń arasynan týnıstik sportshyny atap ótýge bolady. Atalǵan qarsylasymmen budan buryn da kezdesken edim. Tájirıbem jetispedi me, eki márte jeńilistiń aşy dámin tattym. Bul joly meniń jolym boldy. Osy joly ózime senimdi oıyn kórsettim. Bapkerler barlyq aqyl-keńesin aıtty. Fınalda jaqsy jekpe-jek ótkizdim.
— Ýnıversıadaǵa daıyndyq barysy qalaı boldy? Qansha ýaqyt daıyndyq jasadyń?
— Dúbirli doda aldynda meniń azdaǵan jaraqatym bar edi. Soǵan qaramastan bapkerler keńesine, daıyndyǵyma kóńil bóldim.
— Aldaǵy maqsatyń qandaı?
— Endi kúzde taekvondodan eresekter arasynda álem chempıonaty ótedi. Soǵan qatysýǵa nıet jasap otyrmyn. Oǵan daıyndyqty óz deńgeıinde júrgizemin degen oıdamyn. Biz úshin árbir jarys — úlken jaýapkershilik. Eldiń senimin aqtaýǵa tyrysamyz.
— Ýnıversıadada jeńis tórinen tórinen kóringende seni eń aldymen kim quttyqtady?
— Qashan da men úshin ata-anamnyń qoldaýy erekshe. Bul joly da sol úrdisten jańylǵan joq. Jeńiske jetken sátte olar ózderiniń lebizin bildirip jatty. Jaqyndarym da sol lebizge qosyldy. Meniń otbasymda ata-ájem, ákem men anam, aǵam men qaryndasym bar. Otbasymda menen basqa qaryndasym sportpen aınalysady.
Ózimniń sezimimdi sózben jetkizý múmkin bolmas. Týǵan elimniń týyn bıikke kótergenime qýanyshtymyn. Bapkerler daıyndyǵymyzdy udaıy qadaǵalaıdy. Qazirge deıin Qazaqstan chempıonatynda top jarǵan edim.
— Sportpen aınalysqysy keletin jas órenderge qandaı keńes berer ediń?
— Árbir sporttyń óz qıyndyǵy bolady. Bala kezimnen ózim taekvondony tańdadym. Bul sport túri ózime unaıdy. Toǵyz jasymnan taekvondonyń qyr-syryna qanyǵyp kelemin. Alǵash ret úıirme esigin Shymkent qalasynda aǵam ekeýimiz ashqan edik.
Eske salsaq, taekvondodan Qazaqstan ulttyq quramasy XXXII Dúnıejúzilik Ýnıversıada oıyndaryn 1 altyn, 7 qola júldemen aıaqtady.