Tabysy az otbasylarǵa qandaı áleýmettik qoldaý kórsetilip jatyr
Eńbek mınıstrliginiń basshysy 2020 jyldan bastap Qazaqstanda ashyqtyqty, ádildikti jáne ózara jaýapkershilikti kúsheıtý qaǵıdattaryna negizdelgen ataýly áleýmettik kómek (AÁK) kórsetýdiń jańa modeli iske asyrylyp jatqanyn atap ótti (toqsan saıynǵy ótinish, taǵaıyndaý krıterııi – otbasynyń árbir múshesine shaqqandaǵy ortasha tabystyń óńirlik eń tómengi kúnkóris deńgeıiniń 70%-ynan kem mólsheri, balalarǵa arnalǵan tirkelgen tólemniń kúshi joıyldy, eńbekke qabiletti adam jumysqa ornalasýdan bas tartqan jaǵdaıda barlyq otbasy AÁK alý quqyǵynan aıyrylady).
AÁK kórsetýdiń jańa tásilderin engizý sheńberinde 4 jáne odan da kóp balalary bar kópbalaly otbasylarǵa beriletin járdemaqy engizildi jáne tabysy az otbasylardyń balalary úshin kepildik berilgen áleýmettik toptama (áleýmettik toptama) engizildi.
Balalardyń jasyna baılanysty mektep jasyna deıingi balalar men mektep oqýshylaryna arnalǵan áleýmettik toptamanyń eki túri bar. Mektep jasyna deıingi balalarǵa balalar taǵamy jáne gıgıenalyq kerek-jaraqtar, mektep jasyndaǵy balalarǵa mektepte ystyq tamaq, mektep kıimi men kerek-jaraqtary, jol júrý shyǵystaryn óteý usynylady. Áleýmettik toptama quramyn qalyptastyrý kezinde densaýlyq saqtaý, bilim berý mamandarynyń usynymdary, jurtshylyqtyń pikiri eskerildi. 2020 jyly 435 myń bala áleýmettik toptama aldy.
«2020 jyly barlyǵy 936 myńnan astam adam nemese tabysy az 185 myń otbasy, onyń ishinde 600 myń bala (64%), 73,5 myń kópbalaly otbasy AÁK aldy. Tólemderdiń jalpy somasy 88 mlrd teńgeni qurady», – dedi Serik Shápkenov.
Eńbekke qabiletti kómek alýshylardy jumyspen qamtýǵa erekshe nazar aýdaryldy.
«Jumyspen qamtýǵa járdemdesýdiń belsendi sharalaryna 201 myń adam nemese eńbekke qabiletti AÁK alýshylardyń 74%-y (271 myń) tartyldy. 1,4 myń otbasy óz isin damytý úshin jeńildetilgen mıkrokredıt aldy», – dedi mınıstr.
Ol sondaı-aq, 2020 jyly barlyq óńirlerde tabysy az jáne kópbalaly otbasylardy túrli máseleler boıynsha qoldaý ortalyqtary ashylǵanyn atap ótti (31 ortalyqta AÁK taǵaıyndaý, turǵyn úı, jumysqa ornalastyrý, kásipkerlikti damytý jáne t.b. máseleler boıynsha kómek jáne keńes beriledi).
«AÁK-ti odan ári jetildirý maqsatynda jáne alýshylarǵa yńǵaıly bolý úshin biz zamanaýı tsıfrlyq sheshimderdi engizýdi jalǵastyramyz. Máselen, 2021 jyldan bastap AÁK-ke ótinishti Elektrondyq úkimet portaly arqyly berýge bolady. Balalarǵa arnalǵan áleýmettik toptama Áleýmettik qyzmetter portalyna aýystyrylady. Jańa «Eńbek» ulttyq jobasy aıasynda eńbekke qabiletti áleýmettik kómek alýshylardyń tabysyn arttyrý úshin jumysqa ornalastyrý, suranysqa ıe mamandyqtarǵa oqytý, óz isin ashý nemese damytý úshin jeńildikti mıkrokredıtter men granttar berý boıynsha keshendi sharalar usynylatyn bolady», – dep túıindedi Eńbekmıniniń basshysy.
