Tabıǵatta qandalanyń 40 myńnan astam túri bar
Jańa jıhaz ben Second Hand dúkenderinen alynǵan kıimder qandalanyń paıda bolýyna sebep bolýy múmkin. Bul týraly óńirlik kommýnıkatsııalar qyzmetiniń alańynda qalalyq Sanıtarlyq-epıdemıologııalyq baqylaý departamenti men dezınfektsııa ortalyǵynyń sarapshy-epıdemıologtary aıtty, dep habarlaıdy Kazinform.
Mamandardyń aıtýynsha, adam qanymen qorektenetin qandalanyń tabıǵatta 40 myńnan astam túri bar. Qazaqstanda onyń 1 500-in kezdestirýge bolady.
«Adamdar úı qandalasyna talanyp jatqanyn aıtyp, dızenfektsııa ortalyqtaryna jıi shaǵymdanady. Bul jándikter túngi ýaqytta belsendi bolady. Sondaı-aq 4 aıǵa deıin ómir súredi jáne tek adam bar jerde júredi. Qandalalar qyryq kún ishinde damıdy, bir ýaqytta úsh júzge deıin jumyrtqa salady. Olar úshin qolaıly orta - eski aǵash jıhaz. Sondaı-aq eden jaryqtarynda, plıntýs artynda meken etedi. Qandalalar úshin qolaısyz orta - jańa beton monolıtti úıler, biraq adam júrgen jerdiń bári qandalanyń jańa ortaǵa beıimdelýi úshin jetkilikti. Apta saıyn ortalyqqa qala turǵyndarynan 1-2 ótinim kelip túsedi, olar jándikterdiń jańa jıhaz nemese Second Hand dúkeninen kıim satyp alǵanyn keıin paıda bolǵanyn jıi aıtady», - dedi Almaty qalasy boıynsha Dezınfektsııa ortalyǵy dırektorynyń orynbasary Vahıt Seıdýalıev.
Spıker sonymen qatar bólmeni dezınsektsııalyq jumystarǵa daıyndaý boıynsha usynystarymen bólisti.
«Qandalaǵa qarsy óńdeý kezinde birinshi kezekte qoqysty joıý kerek. Eń aldymen, jıhaz artqa tartylady, yńǵaıly jáne kedergisiz óńdeý úshin - barlyq betki qabattar men sańylaýlar dezınsektsııa júrgizýge qoljetimdi bolýy tıis. Azyq-túlik, ydys pen kıimdi alyp tastaǵan jón. Tósek-oryndy qaǵyp, silkip, dalada keptirip alǵan abzal. Óńdeý júrgizý kezinde úı ishinde eshkim bolmaýy kerek. Dezınfektsııa júrgizilgennen keıin bir kún ótken soń qandalalar óledi. Aldyn alý maqsatynda bir aıdan keıin atalǵan úı-jaıǵa dezınsektsııalyq óńdeýdi qaıtalaǵan jón», - dedi ol.
Almaty qalalyq Sanıtarlyq-epıdemıologııalyq baqylaý departamenti basshysynyń orynbasary Gaýhar Qatkenova óńdeý jáne dezınsektsııalyq jumys júrgizetin kompanııany tańdaǵanda nege mán berý kerektigin aıtty.
«Óńdeý jáne dezınsektsııalyq jumys júrgizetin kompanııany tańdaǵanda, eń aldymen, bul naryqta bar-joǵyn eskerý qajet. Ekinshiden, oqýdan ótkeni týraly kýálikteri bar tájirıbeli mamandardyń bolýy shart. Úshinshisi, mamandar óz jumysynda qoldanatyn jabdyqtar men preparattarǵa nazar aýdarǵan durys. Dezınfektsııa, dezınsektsııa, deratızatsııa qyzmetteri básekelestik ortada. Almaty qalasynyń aýdandyq sanıtarlyq-epıdemıologııalyq baqylaý basqarmalarynyń baqylaýynda 36 saqtaý nysany jáne dezınfektsııa, dezınsektsııa, deratızatsııa quraldary men preparattaryn daıyndaý, óndirý, ótkizý boıynsha 24 nysan bar», - dep atap ótti Almaty qalasy Sanıtarlyq-epıdemıologııalyq baqylaý departamenti basshysynyń orynbasary.
