ІT mamany bolýdy armandaımyn – 140 ball alǵan Jánibek Ábilhan

TÚRKІSTAN. KAZINFORM – Ordabasy aýdany Temirlan aýylyndaǵy Shoqan Ýálıhanov atyndaǵy mektep-gımnazııasynyń oqýshysy Jánibek Ábilhan Ulttyq biryńǵaı testileýde eń joǵary ball  – 140 upaı jınap, alǵashqy úzdikter qatarynan kórindi. KAZINFORM tilshisi bilim báıgesinde top jarǵan talapkermen suhbattasyp keldi.

– Jánibek, UBT-ǵa kirer aldynda qandaı kúıde boldyń? Joǵary ball jınaıtynyńa senimdi boldyń ba?

– Iá, azdap qobaljý boldy. Degenmen óz bilimime sendim. Test suraqtary negizinen tanys, burynnan daıyndalǵan taqyryptardan keldi. Sol sebepti asa qıyndyq týyndaǵan joq. Nátıjesinde 140 ball jınadym.

– Bolashaq mamandyǵyń retinde qandaı salany tańdamaqsyń?

– Armanym – ІT salasynyń mamany bolý. Baǵdarlamalar qurastyrý, jańa júıelerdi meńgerý maǵan qyzyq. Osy baǵytty tereńdetip oqyǵym keledi. Sol sebepti UBT-da beıindik pán retinde ınformatıkany tańdadym. Qaı ýnıversıtetke túsetinimdi naqty sheshken joqpyn, biraq Almaty qalasynda bilim alsam degen oıym bar.

– UBT-ǵa daıyndyq qalaı ótti?

– 10-synyptan bastap beıindik pánderge den qoıyp, josparly túrde daıyndyqty bastadym. Informatıkaǵa degen qyzyǵýshylyǵym burynnan bar. Sabaqta belsendi boldym, qosymsha kýrstarǵa qatystym. Bar kúshimdi saldym. Osy tusta maǵan bilim men tárbıe, baǵyt-baǵdar bergen ustazdaryma alǵysym sheksiz.

– Kópbalaly otbasynan ekeniń belgili. Іnileriń de oqýda úzdik pe?

– Iá, otbasymyzda bes balamyz. Úlken aǵam qyzmette. Men – ekinshi balamyn. Ózimnen keıingi úsh inimniń de sabaq úlgerimi jaqsy. Kúndelikteri 4 pen 5-ke toly.

Aıta keteıik, Jánibektiń synyp jetekshisi Gúlzıra Bortaı shákirtiniń joǵary nátıje kórsetetinine senimdi bolǵanyn jetkizdi. Onyń aıtýynsha, Jánibek sabyrly, bilimge qushtar ári jaýapkershiligi joǵary oqýshy bolǵan.

Al anasy Gýlıa Boranbaeva áleýmettik jelide tarap jatqan «páter berý» jaıly aqparatqa qatysty pikir bildirdi:

– Balam oqyǵan qosymsha bilim berý kýrsy «140 ball alǵan oqýshyǵa páter syılaımyz» dep jarııalaǵan eken. Biraq onyń ras-ótirigin naqty bilmeımiz. Biz de tek áleýmettik jelidegi aqparattan ǵana habardarmyz, – dedi ol.

Eske sala keteıik, budan buryn Túrkistan oblysynyń oqýshysy UBT-dan eń joǵary 140 upaı jınaǵanyn jazǵan bolatynbyz.