«Sizdiń daýsyńyz mańyzdy»: Astanada eki jyldyq joba qorytyndylandy
Astanada «Sizdiń daýysyńyz mańyzdy» jobasynyń eki jyldaǵy qorytyndysy talqylandy, dep habarlaıdy Kazinform.
Bıýdjettiń qanshalyqty el ıgiligine jumsalyp jatqanyn baqylaıtyn «Ras aitamyn» medıasy, Mańǵystaý halqynyń búkil bazynasyn ákimdikke aıtýǵa baǵyttalǵan «Ákim chaty», erekshe muqtajdyǵy bar balalardyń ata-analaryna keńes beretin «Ozim Platform» mobıldi qosymshasy, aýa sapasyna monıtorıng jasaıtyn Airkaz.org saıty, jastarǵa jynystyq bilim beretin @aspanchatbot telegram kanaly, ákimder jumysyna monıtorıng jasaıtyn «Obojaıý» Youtube-arna. Bulardyń bári qazaqstandyqtardyń ómirine tsıfrlyq sheshimderdiń qanshalyqty dendep kirgenin kórsetedi.
Ortalyq Azııanyń Eýrazııa qory 2022 jyldan beri osylarǵa uqsas tsıfrlyq sheshimderdiń qarapaıym adamdar arasyndaǵy tanymaldyǵyn arttyryp, turǵyndardy azamattyq tehnologııalardy kúndelikti turmysta qoldanýǵa mashyqtandyratyn sharalar uıymdastyryp keledi. Astanada sol jobanyń eki jyldyq qorytyndysy jarııalandy.
«Sizdiń daýsyńyz mańyzdy» degen uranmen uıymdastyrylǵan joba 100 myńnan astam qazaqstandyqty qamtyǵan.
Jobaǵa qoldaý kórsetken uıym – Eýropa Odaǵynyń Qazaqstandaǵy Ókildigi. Atalmysh ókildiktegi yntymaqtastyq bóliminiń basshysy Iohannes Baýr joba Qazaqstannyń túrli óńirin qamtyǵany durys boldy dep esepteıdi.
«Joba kóptegen azamatqa óte naqty jaǵdaılarda kómektese aldy. Eń bastysy, jobanyń nátıjesinde jaǵymdy keıster paıda boldy. Joba astorlary ákimdiktermen, azamattyq uıymdarmen jumys istedi. Osy arqyly qarapaıym halyq pen memlekettik organdar qatar paıdalanatyn, aradaǵy baılanysty shynaıy ete túsetin kópir qalyptasyp úlgerdi», - deıdi ol.
Qor dırektory Rınad Temirbekov Qazaqstanda usaq-túıek dep sanalatyn, biraq barlyq derlik óńirge tán problemalar kóp ekenin aıtady.
«Qazaqstandaǵy usaq-túıek dep sanalatyn problemalardyń kóbi birneshe óńirge tán bolyp keledi. Sondaı problemalardy sheshýge arnalǵan bastamalardy qoldaý úshin Eýropa odaǵynyń demeýimen «Sizdiń daýsyńyz mańyzdy» deıtin jobany qolǵa alǵanbyz. Biz bul jobada qazir qazaqstandyqtar úshin ózekti dep sanalatyn salalardyń bárin qamtýǵa tyrystyq.
Joba aıasynda Qazaqstanda aqparat tehnologııalary qanshalyqty damyǵanyn, olarǵa qarapaıym halyq qanshalyqty qol jetkize alyp júrgenin túsinýge tyrystyq. Óıtkeni áleýmettik problemasy nazardan tys qalyp jatatyn halyqtyń negizgi bóligi aýyldarda turady.
Memlekettiń bul baǵytta joba-josparlary kóp ekenin estımiz. Túrli aqparat platformalaryn quryp jatady. Laıyqty baǵasyn berý kerek, memlekettiń bul baǵyttaǵy bastamalarynyń kóbi tıimdi. Sol tıimdi quraldardy paıdalanýǵa qanshalyqty daıynbyz degen másele taǵy bar.
Interfeıs qanshalyqty qolaıly? Internet sapasy qanshalyqty birkelki? Bul máselelerdi sheship almasaq, aqparat tehnologııalarynyń tıimdiligi tómen bolady.
Bul alǵashqy qadam ǵana shyǵar. Ári qaraı jalǵastyratyn da shyǵarmyz. Oǵan ózge de qoǵamdyq uıymdardy, memlekettik organdardy tartqymyz keledi. Bastamamyzǵa qoldaý bildirgen Eýropalyq Odaq ókilderine alǵysymyz sheksiz. 2022 jyldyń qańtarynan 2023 jyldyń aıaǵyna deıin olardyń tarapynan únemi qoldaý sezinip keldik. Jergilikti ákimdikter de barynsha qoldaý kórsetip jatty.
Joba aıasynda 10-ǵa jýyq grant berildi.
Joba aıasynda biz bólgen granttar men qamtyǵan bastamalar sany bireýge az, bireýge kóp kórinýi múmkin. Biraq biz myńdaǵan adamdy qarapaıym turmystaǵy máselelerdi tsıfrlyq sheshim arqyly sheshýge úırettik. Eń bastysy, ondaı bastamalar kóbinese jastar men áıelderge baǵyttaldy. Bul eki sanat qoǵamdaǵy áleýmettik turǵydaǵy eń bir osal ári eń belsendi toptar deýge bolatyn shyǵar», - deıdi Rınad Temirbekov.
Qordyń menedjeri Anar Arynova eki jyl boıy iske asqan sharalardyń bári tsıfrlyq saýattylyqty arttyrýǵa, qoǵam ómirine belsendi aralasýǵa múmkindik beretin basqa da quraldardy meńgertýge baǵyttalǵanyn aıtady.
«Qazaqstanda azamattyq tehnologııalardyń eki deńgeıi bar. Onyń birinshisi – memlekettik organdar usynyp otyrǵan eGov, eOtinish sııaqty platformalar.
Bizden grant alýshylar halyqqa osy quraldardy qoldanýdy úıretti. Mysaly, múgedektikti rásimdep, tirketý máselesin jeńildetýge atsalysty. Balalardyń emdeý kvotalaryn elektrondy quraldar arqyly rásimdeý qanshalyqty ońaı ekenin kórsetti. Keıbir jastar ata-anasynyń shıpajaıda em alýyna ótinim joldap úırendi.
Azamattyq tehnologııalardyń ekinshi deńgeıi – halyq ishinen shyqqan bastamalar. Bir jaǵynan bular memlekettik organdar usynǵan quraldardyń jumysyn tolyqtyryp, tipti keıde ornyn basyp jatyr. Ásirese, áleýmettik jelini pikir aqtaratyn oryn ǵana emes, naqty problemany sheshetin orta retinde paıdalaný beleń alyp keledi. Bul bizdiń «Sizdiń daýsyńyz mańyzdy» degen uranymyzǵa saı. Áleýmettik jeliniń bul turǵyda eń qýatty, eń mańyzdy qural ekenin anyq kórdik», - deıdi Anar Arynova.
Joba aıasynda qazaq jáne orys tilderinde jınaq ázirlenipti. Oǵan qoǵamdaǵy máselelerdi azamattyq tehnologııalar arqyly sheshýmen kópshilik kózaıymyna aınalǵan 11 keıs týraly qyzyqty málimetter usynylǵan.
