Syrdarııa arnasyn tazartýǵa bólingen bıýdjet qarjysy 3 jyl boıy ıgerilmegen
«Túrkistan oblysynyń ákimdigimen bıylǵy barlyq kózdelgen sý tasqynyna qarsy is-sharalardy júzege asyrýǵa 1,9 mlrd teńge qarajat bólindi. Sondaı-aq Úkimet qoldaýymen Tótenshe jaǵdaılar mınıstrligi arqyly maqsatty transfertter esebinen Qyzylorda, Batys Qazaqstan jáne Atyraý oblystarynyń ákimdikterine 15 mlrd teńgeden astam qarjy bólindi», - dedi TJ mınıstri Úkimet otyrysynda.
Sonymen birge, S. Sháriphanov sý tasqynyna qarsy 2021-2023 jyldarǵa arnalǵan jol kartasyn oryndamaýdyń negizgi sebepterin atady.
«Birinshi, Іs-sharalardy sapasyz josparlaý, bıýdjettik ótinimderdi ýaqytyly bermeý nemese qurylys-montajdaý jumystaryn júrgizýge qarajattyń bolmaýy. Mysaly, Shymkent qalasynda Bozaryq kanalyn kúrdeli jóndeý josparlanǵan, alaıda áli kúnge deıin tehnıkalyq tekserýden basqa eshqandaı jumys júrgizilmedi. Qyzylorda oblysy boıynsha kerisinshe, úshinshi jyl qatarynan Syrdarııa ózeniniń arnasyn tazartýǵa bólingen bıýdjet qarajaty ıgerilmeı otyr. Bıyl da ıgerilmeý qaýpi bar», - dep túsindirdi mınıstr.
Mınıstrdiń aıtýynsha, jobalaý-smetalyq qujattamany ýaqytyly daıyndamaý da yqpal etken.
«Mysaly, Batys Qazaqstan oblysy Oral qalasy sheginde Jaıyq jáne Derqul ózenderiniń jaǵalaýyn nyǵaıtý, Malaıa Bykovka ózenindegi bógetterdi nyǵaıtý jáne Tasqala aýylyndaǵy Derqul ózeniniń arnasyn túzetý sharalaryn ýaqytyly júrgizbeý qaýpi saqtalýda. Osy óńirdegi sý tasqyny jaǵdaıy Prezıdent Ákimshiliginiń erekshe baqylaýynda ekenin atap ótken jón jáne oblys ákimdigi buǵan deıin Úkimetke Jol kartasynyń barlyq is-sharalarynyń ýaqtyly aıaqtalatynyn habarlaǵan bolatyn», - deıdi S. Sháriphanov.
Sonymen birge, Ekologııa jáne tabıǵı resýrstar mınıstrligi Aqmola oblysynda Esil kontrregýlıatorynyń qurylysyn keshiktirýde, osy ýaqytqa deıin memlekettik saraptama rásiminen ótpegen jobalaý-smetalyq qujattamany ázirleý bir jylǵa jýyq júrgizilýde.
