Syr óńirinde qoqys óńdeıtin zaýyt salynbaq
Osy maqsatta «Smart city» jobasyn júzege asyrýǵa jol ashylady. Qazirgi tańda osy maqsatta Qytaıdyń CNEEC memlekettik ınjenerlik kompanııasymen kelissózder júrgizilýde.
Óńirlik kommýnıkatsııalar qyzmetiniń habarlaýynsha, bul kompanııa álemniń 70-ke jýyq memleketinde jylý, jel jáne sý elektr stansalaryn salǵan. Sondaı-aq, qoqys óńdeıtin zaýyttar salý isinde de jınaqtaǵan tájirıbesi bar.
Qyzylorda óńiri kún kózi jóninen belsendi aımaq ekeni belgili. Atap aıtqanda, jaıdary jaz mezgilinde onyń belsendiligi aıqyn ańǵarylady. Ol qýattylyǵy joǵary kún elektr stansasyn salýǵa mol múmkindik týǵyzady. Al «Aqlaq» sý tospasynda sý elektr stansasy salynsa, odan jergilikti jurt óz paıdasyn kóredi. Sebebi, onda 20-25 megavattyq sý elektr stansasyn ornatýǵa bolady.
Syr óńirinde qoqys óńdeıtin zaýyt salýǵa da mańyz berilip otyr. Ol aımaqta qaldyqtardy órteý jáne elektr energııasynyń belgili mólsherin shyǵarýdy kózdeıtin eki mindetke negizdelgen.
Syr óńirinde «Smart city» (Aqyldy qala) jobasyn júzege asyrý úshin Qytaıdyń álemge tanymal «Huawei» kompanııasymen ózara áriptestik týraly memorandým jasalǵan. Osy baǵyttaǵy alǵashqy jobalar Qyzylordanyń darııanyń sol jaǵalaýyndaǵy jańa bóliginde memlekettik-jekemenshik áriptestik negizde qolǵa alynady dep kútilýde.
Ádilet QAŃTARBAEV
