Sybaılas jemqorlyqqa qarsy is-qımyl agenttiginiń uıymdyq-shtattyq qurylymy ońtaılandyryldy
Qazirgi ýaqytta agenttiktiń kadr saıasatynyń basty baǵdary – sybaılas jemqorlyqqa qarsy kúres úshin jańa kózqaras pen batyl ıdeıalardy usynýǵa qabiletti, jigerli talantty adamdardy tartý jáne óz qatarynda ustaý.
Onyń negizgi quraly ýájdemeleý jáne eń aldymen – joǵary deńgeıli jalaqy. Ony qamtamasyz etý úshin organnyń uıymdyq-shtattyq qurylymyn jáne ishki bıznes protsesterin ońtaılandyrý boıynsha úlken jumys atqaryldy.
Onyń nátıjeleri boıynsha artyq basshylyq býyn 2 esege jýyq qysqartyldy, basqarýshy laýazymdar sany 453-ten 240-qa deıin azaıtyldy (basshylardyń oryndaýshylarǵa araqatynasy 1-den 7-ge deıin jetkizildi), qosalqy qyzmetterdiń qyzmeti ortalyqtandyryldy, óńirlik bólimshelerdiń 90% - y taratyldy. Sonyń saldary retinde alańdardy, kólikti kútip ustaýǵa, uıymdastyrý tehnıkasy men sharýashylyq taýarlaryn satyp alýǵa jáne basqa da shyǵyndarǵa ilespe ákimshilik shyǵystardy ońtaılandyrý júrgizildi.
Ońtaılandyrý qorytyndysy boıynsha qarajatty únemdeý tsıfrlandyrýǵa, «ANTIKOR ORTALYGY» servıstik ortalyǵynyń qurylysyna, qyzmetkerlerdiń jalaqysyn arttyrýǵa jáne olardy materıaldyq ýájdemeleý úshin syıaqy qoryn qalyptastyrýǵa baǵyttalǵan, nátıjesinde qyzmetkerlerdiń tabys mólsheri eki esege derlik artty.
Bul jobany iske asyrý taǵy bir mańyzdy mindetti sheshýge - quqyq qorǵaý qyzmetiniń bedelin arttyrýǵa yqpal etti. Jeke kompanııalar qyzmetkerleriniń eńbekaqysynyń mólsherimen salystyrylatyn jalaqynyń joǵary deńgeıi azamattyq sektordan jáne basqa da memlekettik organdardan joǵary bilikti kadrlardyń kelýin qamtamasyz etti.
Búgingi tańda jeke quram basqa quqyq qorǵaý jáne arnaıy organdardyń joǵary bilikti mamandarymen aıtarlyqtaı kúsheıtildi:
7 – eýiniń Prezıdent Ákimshiligi men Premer-Mınıstrdiń Keńsesinde, 15-iniń ulttyq qaýipsizdik organdarynda, 29-ynyń prokýratýrada, 17-siniń azamattyq sektorda jumys tájirıbesi bar. Onyń ishinde árqaısysy Agenttiktiń uıymdyq qurylymynda mańyzdy oryndarǵa ıe.
Agenttiktegi memlekettik qyzmettiń bedeli men tartymdylyǵyn atap ótken jón. Muny bizge jumysqa kirýge nıet bildirýshilerdiń sany dáleldeıdi. Osylaısha, «B» korpýsynyń bos laýazymdaryna ornalasýǵa arnalǵan konkýrstarǵa orta eseppen bir orynǵa 21 úmitker qatysady. Bul basqa ortalyq memlekettik organdarǵa úmitkerlerdiń ortasha kórsetkishinen 3 ese joǵary – bir orynǵa 7 adam.
Jalpy jekelegen laýazymdarǵa konkýrsqa qatysýshylar sany 1 orynǵa 37 adamǵa deıin jetedi.
Kadr saıasatyn qurý kezinde qyzmetkerlerdiń bilim sapasyna basa nazar aýdaryldy. Qazirgi ýaqytta Agenttikte sheteldik joǵary oqý oryndarynyń 32 túlegi jumys isteıdi, olardyń 12-i «Bolashaq» baǵdarlamasy boıynsha bilim alǵan. 2 qyzmetker PhD dárejesine ıe, taǵy ekeýi ony alýǵa daıyndalýda, 10 qyzmetker ǵylym kandıdaty, 127-si magıstr.
Sonymen qatar, qazirgi ýaqytta sheteldik joǵary oqý oryndarynda 7 adam, onyń ishinde altaýy «Bolashaq» baǵdarlamasy boıynsha bilim alýda. Sondaı-aq, Sot tóreligi akademııasynda – 2, QR Prezıdentiniń janyndaǵy Memlekettik basqarý akademııasynda – 3, Quqyq qorǵaý organdarynyń akademııasynda – 2 adam doktorantýra jáne magıstratýra baǵdarlamalary boıynsha oqýda.
Agenttiktiń 5 qyzmetkeri Prezıdenttik Jastar kadrlyq rezerviniń músheleri bolyp tabylady, bul vedomstvonyń az sanyn eskere otyryp, memlekettik organdar arasyndaǵy eń joǵary kórsetkishterdiń biri ekenin atap ótý jón.
Agenttik qyzmetkerleri joǵary kásibı qasıetterden basqa ártúrli salalarda basqa talanttarǵa ıe. Mysaly, Qaraǵandy oblysynda taekvondodan Halyqaralyq dárejedegi sport sheberi, 1-dan qara belbeý ıegeri, eki dúrkin álem chempıony, Álem kýbogynyń absolıýtti ıegeri Álııa Súleımenova jumys isteıdi. Kóptegen qyzmetkerler shyǵarmashylyqpen aınalysady, olardyń keıbireýleri respýblıkalyq konkýrstardyń laýreattary. Aqmola oblysy boıynsha departamenti basshylarynyń biri Arman Berdalın halyqaralyq jáne respýblıkalyq aıtystardyń jeńimpazy, birneshe óleń kitaptardyń avtory, aqyndardyń halyqaralyq odaǵynyń múshesi bolyp tabylady.
Joǵary turǵan laýazymdarǵa kadrlyq irikteýdiń ashyqtyǵy men obektıvtiligin qamtamasyz etý, laýazymdyq ıerarhııanyń joǵarǵy satylaryna qyzmetkerlerdiń teń qol jetimdiligi qaǵıdatyn iske asyrý maqsatynda basshy laýazymdarǵa irikteý konkýrstyq negizde júzege asyrylady.
Jalpy alǵanda, 100-den astam adam joǵary laýazymdarǵa usynyldy, bul sybaılas jemqorlyqqa qarsy qyzmettiń merıtokratııa qaǵıdatyn ustanatynyn kýálandyrady.
Sonymen qatar, jaýapkershilikti arttyrý jáne zańdylyq pen qyzmettik tártipti nyǵaıtý maqsatynda barlyq basshylar ózderine baǵynyshty qyzmetkerleri tipti bir ǵana sybaılas jemqorlyq quqyq buzýshylyǵyn jasaǵan jaǵdaıda laýazymynan erikti túrde bosatý týraly jazbasha mindetteme aldy. Qatardaǵy qyzmetkerler de osy bastamamen jazbasha túrde habardar etildi.
Agenttiktiń kadrlyq jumysyndaǵy jańashyldyq «Parasatty adam para almaıdy» degen halqymyzdyń danalyq sózderi negizge alynǵan, jeke quramdy adal, salaýatty, áleýmettik jaýapty jáne ádepti ómir saltyn júrgizýge ýájdemeleýdiń túbegeıli jańa quraly - qyzmetkerlerdiń jeke parasattylyq kartalary bolyp otyr.
Kadr máselelerin ortalyqtandyrýmen qatar bıznes-protsesterdi avtomattandyrý boıynsha jumystar belsendi júrgizilýde. HR-analıtıka qaǵıdattaryn paıdalana otyryp, E-kadrlar júıesi engizilýde.
Qyzmetkerlerdi oqytý máselesine erekshe kóńil bólinedi.
149 qyzmetker Qazaqstan Respýblıkasy Prezıdentiniń janyndaǵy Memlekettik basqarý akademııasynda jáne Bas prokýratýra janyndaǵy Quqyq qorǵaý organdary akademııasynda biliktilikti arttyrý kýrstarynan ótti.
Budan basqa, qyzmettik daıarlyq sheńberinde ortalyq apparat pen aýmaqtyq departamentterdiń jeke quramymen apta saıyn sabaqtar ótkiziledi. Aıtalyq, «Adaldyq saǵaty», turǵyn úı tólemderin taǵaıyndaý tártibi týraly sabaqtar ótkizildi, jalpyǵa birdeı deklaratsııalaý, memlekettik qyzmetshiler men quqyq qorǵaý organdary qyzmetkerleriniń sybaılas jemqorlyq úshin jaýapkershiligin qatańdatý, Parlament Májilisi men máslıhattar depýtattyǵyna saılaýdy uıymdastyrý tártibi jáne t. b. boıynsha talaptar jetkizildi.
Agenttikte alǵash ret psıhologııalyq qyzmet quryldy, ortalyqta jáne árbir óńirlik bólimshede psıhologtardyń shtattyq laýazymdary engizildi, psıhologııalyq jeńildetý kabınetteri jabdyqtaldy.
Agenttiktiń bastamasymen memlekettik organdar arasynda alǵash ret «Jumys ornyndaǵy ál-aýqat» jobasy iske asyrylýda. Jobanyń maqsaty jumys berýshi men jumyskerler arasyndaǵy ózara qarym-qatynasty jaqsartý salasynda halyqaralyq tájirıbeni engizý bolyp tabylady.
Yntalandyrý jeke sińirgen eńbegi men qosqan úlesi negizinde, nagradalar ıerarhııasyn mindetti túrde saqtaı otyryp (tómengiden joǵary deńgeıge) qyzmetkerlerdi «ataýly yntalandyrý» tájirıbesi engizildi.
Kótermeleýdiń dástúrli quraldarynan basqa organda qyzmetkerlerdiń ata-analaryna qosqan úlesi úshin alǵys hattardy joldaý qoldanylady. Bul qyzmetkerlerdi moraldyq turǵydan yntalandyrady, olardyń sanasynda jumysyna degen qurmet pen onyń nátıjeleriniń mańyzdylyǵyn túsinýdi nyǵaıtady.
Budan basqa, ujymda qolaıly moraldyq-psıhologııalyq ahýaldy qalyptastyrý sheńberinde turaqty negizde Tóraǵanyń atynan Agenttiktiń jáne aýmaqtyq departamentterdiń qyzmetkerleri men erikti jaldanbaly quramynyń jumyskerlerine týǵan kúnderine baılanysty quttyqtaý hattary daıyndalady. Quttyqtaýlar daýys kúsheıtý baılanysy arqyly da aıtylady.
Memleket Basshysynyń bizdiń vedomstvonyń qyzmetine joǵary baǵa berýi erekshe nazar aýdarýǵa laıyqty.
Ótken jyly 2 qyzmetker general ataǵyna ıe bolsa, 13 qyzmetker memlekettik nagradalarmen nagradtaldy.
Sonymen qatar, Memleket basshysy Agenttiktiń joǵary generaldyq ataqtar berýdi kózdeıtin, atap aıtqanda, Nur-Sultan jáne Almaty qalalary departamentteriniń basshylary úshin laýazymdar tizbesin keńeıtý týraly bastamasyn qoldady.
Ujymda qolaıly moraldyq-psıhologııalyq klımatty qalyptastyrýdyń mańyzdy sharttaryna onyń qyzmetkerlerin áleýmettik qamsyzdandyrý jatady. Mysaly, turǵyn úı máselesin sheshý qyzmetkerlerdiń tıisti ýájdemesin qamtamasyz etý maqsatynda ǵana emes, sybaılas jemqorlyq táýekelderiniń aldyn alý úshin de strategııalyq mańyzdy bolyp tabylady. Eger qyzmetker kúndelikti turǵyn úı jáne basqa da turmystyq máselelerge alańdasa, sybaılas jemqorlyq azǵyrýlaryna boı aldyrý yqtımaldyǵy áldeqaıda joǵary.
Búgingi kúni jeke quramnyń 80% - dan astamy turǵyn úımen qamtamasyz etilgen. Sonymen qatar, Memleket basshysy Agenttiktiń jedel-tergeý quramynyń qyzmetkerlerine turǵyn úı tólemderin belgileý týraly Zańǵa qol qoıdy. Ótken jyldyń sońynda olar turǵyn úıge muqtaj 260 qyzmetkerge esepteldi.
Sonymen qatar, Nur-Sultan, Kókshetaý jáne Taldyqorǵan qalalarynda 121 qyzmetkerge quny naryqtyq baǵadan tómen páterlerdi alý úshin qurylys salýshylarmen kelisim jasaldy.
Ótken jyldyń maýsym aıynda Agenttik janynan «Sybaılas jemqorlyqqa qarsy qyzmet organdarynyń qazaqstandyq ardagerler uıymy» respýblıkalyq qoǵamdyq birlestigi quryldy.
Bul Keńeske qarjy polıtsııasy jáne sybaılas jemqorlyqqa qarsy qyzmet organdarynyń ardagerleri kirdi. Olardyń mindetterine sybaılas jemqorlyqqa qarsy qyzmet organdary qyzmetkerleriniń jas býynyn patrıottyq jáne quqyqtyq tárbıeleý, olardyń kásibıligin arttyrý, qyzmettik boryshyn minsiz oryndaý boıynsha sanasyn qalyptastyrý, sondaı-aq qyzmettik árekette, kúndelikti qyzmette zańdylyqty saqtaýda tájirıbelik jáne ádistemelik kómek kórsetý jatady.
Jaqyn keleshekte kadrlyq jumys baǵyty boıynsha úzdik sheteldik jáne otandyq korporatıvtik tájirıbeler negizinde adamı kapıtaldy damytý máseleleri basymdyqta bolady.
Ózekti quzyretterdi qalyptastyrý úshin qyzmetkerlerdi úzdiksiz oqytý men olardyń biliktiligin arttyrýdyń qazirgi zamanǵy júıesi qurylatyn bolady.
Basty nazar kásibı bilimdi jetildirýge ǵana emes, ıkemdi daǵdylardy damytýǵa da aýdarylatyn bolady. Sóz kreatıvtilik, qatynasqa ázirlik, synı oılaý, kóshbasshylyq, komandada jumys isteý, nátıjege baǵdarlanýda bolyp otyr.
Osyǵan baılanysty organnyń kadr saıasaty Qazaqstannyń, jaqyn jáne alys shetelderdiń jetekshi oqý oryndarymen syndarly jáne áriptestik qarym-qatynas qurýǵa baǵyttalatyn bolady.
