Suıytylǵan munaı gazyn eksporttaýǵa tyıym salý merzimi taǵy uzartyldy

ASTANA. KAZINFORM — Eksportqa tyıym salý týraly buıryqqa QR Energetıka mınıstri qol qoıdy jáne 2025 jylǵy 14 mamyrda kúshine enedi, dep habarlaıdy Energetıka mınıstrliginiń baspasóz qyzmeti.

— 2023 jyldyń qarashasynan bastap suıytylǵan munaı gazyn Qazaqstan Respýblıkasynyń shekarasynan tys jerlerge avtomobıl jáne temirjol kóligimen áketýge tyıym salyndy. Eksportqa tyıym salý týraly buıryqtyń merzimi 2025 jyldyń 14 mamyrynda aıaqtalady, — delingen habarlamada.

Osyǵan baılanysty ishki naryqty suıytylǵan munaı gazymen qamtamasyz etý maqsatynda Qazaqstan Respýblıkasynyń aýmaǵynan suıytylǵan munaı gazyn (EAEO SEQ TN kody 2711 12 970 0), propandy (EAEO SEQ TN kody 2711 12 940 0) jáne býtandy (EAEO SEQ TN kody 2711 13 970 0) avtomobıl jáne temirjol kóligimen áketýge alty aı merzimge tyıym salý mynalardy qospaǵanda engiziledi:

1) ónimdi bólý týraly kelisim (kelisimshart) ne Qazaqstan Respýblıkasynyń Prezıdenti bekitken jer qoınaýyn paıdalanýǵa arnalǵan kelisimshart sheńberinde óndirýdi júzege asyrǵan, «Salyq jáne bıýdjetke tólenetin basqa da mindetti tólemder týraly» Qazaqstan Respýblıkasy Kodeksiniń (Salyq kodeksi) 722-babynyń 1-tarmaǵyna sáıkes salyq rejıminiń turaqtylyǵyna ıe jer qoınaýyn paıdalanýshylardyń áketýin;

2) qazaqstandyq shıkizattan jasalǵan (óńdelgen), Qazaqstan Respýblıkasynyń halyqaralyq sharttary negizinde Qarashyǵanaq ken ornynda óndirilgen taýarlardy áketýdi;

3) Qazaqstan Respýblıkasynyń sheginen tys jerde bastalatyn jáne aıaqtalatyn ótkiziletin tranzıttik tasymaldy.

Buǵan deıin 26 sáýirde suıytylǵan gazdy Qazaqstan aýmaǵynan áketýge tyıym salý uzartylǵan edi.