Súıekti qalpyna keltiretin bıomaterıal ázirleýge 160 mln teńge jumsaldy - ǵalymdar
«2008-2010 jyldary Mysyrdan kelgen aspırantym Ahmet Hanýr bizde áli sıntezdelmegen, biraq satylymda bar gıdroksıapatıtti qoldaný jumysyn júrgizgen. Ony tıtan ımplanttar betine jaǵyp, kandıdattyq dıssertatsııasyn qorǵap, ketip qaldy. 2017 jyly Shyńǵys Daýylbaev ekeýmiz onyń dıssertatsııasynyń taqyrybyn anyqtadyq – «Gıdroksıapatıtti qoldaný sıntezi, ony jumyrtqa qabyǵynan jáne fosfor qyshqylynan alý» , - dep baıandady Zulqaıyr Mansurov telefon arqyly áńgimelesý barysynda.
Onyń aıtýynsha, qazirdiń ózinde materıaldyń sapasy jaqsy ekeni belgili boldy.
«Onyń dıssertatsııasynyń negizinde biz ǵylymı qorǵa gıdroksıapatıt sıntezin tapsyrdyq. Bizge 160 mıllıon teńge bólindi, taza bólme jasadyq. Kazirgi ýaqytta bul materıaldardy sertıfıkattaý protsesteri júrip jatyr. Bıomaterıal óte jaqsy qasıetterin tanytty - 97-98% tazalyq. Bul jumysty professor Temirbaevpen birlese atqaryp jatyrmyz, ol qazirdiń ózinde ony tájirıbe barysynda paıdalanyp jatyr», - dep qosty professor.
Buǵan deıin habarlaǵanymyzdaı, qazaqstandyq ǵalymdar súıek tinin qalpyna keltirýge arnalǵan qoljetimdi bıomaterıal – gıdroksıapatıtti oılap tapty. Ol bıologııalyq shıkizattan termııalyq óńdeý, kúıdirý, arnaıy hımııalyq reaktsııalar jáne «posttermııalyq» kúıdirý arqyly alynady.
