Sút pen qus eti ımportyna táýeldilik tómendeıdi – QR AShM
ASTANA. KAZINFORM – Jyl basynan beri elimizde 16 taýarly-sút fermasy paıdalanýǵa berildi. Aýyl sharýashylyǵy mınıstri Aıdarbek Saparov sút pen qus eti boıynsha ımportqa táýeldilikti tómendetý jumystary týraly aıtyp berdi.
«Bul maqsatta ákimdikter úshin et baǵytyndaǵy qus fabrıkalaryn jáne taýarlyq sút fermalaryn qurý men keńeıtý boıynsha ındıkatıvter jetkizildi. Máselen, bıyl sútti mal sharýashylyǵynda ımportty almastyrý mindetine sáıkes, qýaty 373 myń tonna sútti quraıtyn 65 taýarlyq sút fermasyn iske qosý josparlanǵan. Bul maqsattarǵa respýblıkalyq bıýdjetten 100 mlrd teńge qarjy baǵyttaldy», - dedi mınıstr búgingi Úkimet otyrysynda.
Birinshi jartyjyldyqta qýaty 67,2 myń tonna sút bolatyn 16 joba paıdalanýǵa berildi. Osylaısha, jyldyq jospar 24,6%-ǵa oryndalǵan.
Atalǵan jobalardy iske asyrýdyń ajyramas bóligi – joǵary ónimdi asyl tuqymdy mal satyp alý. Taýarlyq sút fermalaryn salý aıasynda bıyl 30 myń bas iri qara maldyń analyq basyn ımporttaý josparlanǵan. Búgingi tańda segiz aımaq 7,4 myń bas ákeldi nemese josparlanǵan kólemniń 24,6%-y oryndaldy.
«Et baǵytyndaǵy qus fabrıkalaryn qurý men keńeıtý boıynsha bıyl 72 myń tonnaǵa jýyq qus etin shyǵaratyn 10 joba josparlanǵan, onyń ishinde Almaty jáne Qyzylorda oblystarynda eki joba iske qosyldy nemese bul jospardyń 20%-y», - dedi Aýyl sharýashylyǵy mınıstri.
