Sulý sózdiń súleıi Sáken Júnisovtiń týǵanyna - 80 jyl
Ádebı keshke qalamgerdiń týǵan-týystary, dostary, QR Parlamentiniń depýtattary, qoǵam jáne mádenıet qaıratkerleri, aqyn-jazýshylar qatysty.
"Izin qýyp kele jatqan Júrsin Erman, Tursyn Jurtbaı jáne taǵy basqa inileri, bizder sol báıterektiń mańynda júrýshi edik. Sákeńniń búkil shyǵarmasy eliniń azattyǵy úshin, ultynyń rýhyn kóterýge arnalǵan. Eń alǵashqy "Japandaǵy jalǵyz úı" romanynan bastap, sońǵy shyǵarmalaryna deıin barsha qazaqtyń kórgen qasiretin, ulttyń tartqan azabyn kórkem shyǵarmada ádemi órgen, keńistigi de keń, bıiktigi de zańǵar qazaqtyń uly jazýshysy bolatyn", - dep eske alady Memlekettik syılyqtyń ıegeri, aqyn Nesipbek Aıtuly. - Segiz qyrly kisi deıdi ǵoı qazaq, ol kisiniń qyry tipti segizden de kóp. Balýandyǵy, ánshiligi, jazýshylyǵy, batyrlyǵy, seriligi bar, qajet bolsa, keıde periligi de bolatyn, anaý-mynaýlardyń jynyn qaǵyp alatyn".
Sáken Júnisov 1934 jyly 11 aqpanda Kókshetaý (qazirgi Aqmola) oblysynyń Qyzyltý aýdany, Kishkenekól aýylynda týǵan. Qazaq memlekettik ýnıversıtetin támamdaǵannan keıin eńbek jolyn "Pıoner" (qazirgi "Aq jelken") jýrnalynda ádebı qyzmetker bolyp bastady. M.Áýezov atyndaǵy Qazaqtyń memlekettik akademııalyq drama teatrynda ádebıet bóliminiń meńgerýshisi, KSRO Ádebı qory Qazaq bólimshesiniń dırektory, Qazaqstan Jazýshylar odaǵynyń hatshysy qyzmetterin abyroıly atqardy.
Sáken Júnisov biryńǵaı jazýshylyqpen aınalysqan jarty ǵasyrǵa taıaý shyǵarmashylyq ómirinde qazaq ádebıetin órkendetýge ólsheýsiz úles qosty. "Aqan seri" dılogııasy, "Japandaǵy jalǵyz úı", "Zamanaı men Amanaı" romandary qalyń oqyrman qaýymnan da, ádebı synnan da joǵary baǵa aldy. "Ajar men ajal", "Tutqyndar", "Qyzym, saǵan aıtam", "Jaraly gúlder", "Qos anar", taǵy basqa pesalary respýblıka teatrlarynda tabyspen qoıyldy. Jazýshynyń "Óliara" pesasyna 1986 jyly Qazaqstan Respýblıkasynyń Memlekettik syılyǵy berildi. Kóptegen shyǵarmalary shet tilderine aýdaryldy. Qalamgerdiń ózi de L.Tolstoı, S. Tsveıg, O.Gonchardyń áńgimeleri men romandaryn qazaq tiline tárjimalady.
S. Júnisovtiń qalamynan týǵan tańdaýly shyǵarmalary qazaq ádebıetiniń altyn qorynan berik oryn alǵan qundy dúnıeler bolyp tabylady.