Sultan Zaýrbek: Matchroom Boxing promoýterlik kompanııasynan usynys tústi

ASTANA. KAZINFORM – Qazaqstandyq kásipqoı boksshy Sultan Zaýrbek (19-0, 13KO) bolashaqta tanymal brıtanııalyq Matchroom Boxing promoýterlik kompanııasymen kelisimshart jasasýy múmkin. 

Bul týraly boksshy búgin Astanada ótken «Battle of the Brave» boks keshiniń baspasóz konferantsııasynda Kazinform tilshisine aıtty. 

Sultan Zaýrbek qazirgi ýaqytta anglııalyq Wasserman Boxing promoýterlik kompanııasy aıasynda judyryqtasyp júrgenin atap ótti. 

– Birneshe jyl boıy osy kompanııamen jáne bir menedjermen birge jumys istep kelemiz. Bizge Matchroom Boxing promoýterlik kompanııasynan usynys tústi. Qazirgi ýaqytta menedjerim kelissóz júrgizip jatyr, - dedi ol. 

Óz kezeginde qazaqstandyq boksshy bul jaqsy múmkindik ekenin jasyrmady. 

– Eger kelisimge kele alsaq, biz birden 5-6 aıqas ótkizýge shart jasasamyz. Árıne, reıtıngide aldyńǵy qatardaǵy boksshy bolǵandyqtan, Matchroom bizge chempıondyq jekpe-jek ótkizýge múmkindik jasap bere alady, - dedi Sultan Zaýrbek.

Aıta keteıik, Sultan Zaýrbek 5 sáýir kúni Astanada ótetin kásipqoı boks keshinde sharshy alańǵa shyǵyp, Ońtústik Afrıka ókili Azınga Fýzılemen (18-2, 12KO) judyryqtasady. 

Qazirgi ýaqytta, qazaqstandyq boksshy sýper jeńil salmaqta álemdik reıtıngide 21-orynda, al IBF nusqasy boıynsha 5-orynda tur.

Eske sala ketsek, Jánibek Álimhanuly 5 sáýir kúni Astana qalasynda kezekti jekpe-jegin ótkizip, chempıondyq beldikterin qorǵaıdy. Kásipqoı boks keshi elordadaǵy «Barys arena» sport kesheninde ótedi.