Súleımenov munaıǵa táýeldilikten qutylýdyń joldaryn aıtty

ALMATY. QazAqparat - Ulttyq ekonomıka mınıstri Tımýr Súleımenov Ekonomıkalyq yntymaqtastyq pen damý uıymy uıymdastyrǵan Eýrazııa aptalyǵy aıasynda munaıǵa táýeldilikten týyndaǵan máseleler týraly aıtty, dep habarlaıdy QazAqparat tilshisi.

«Bizde syn-qater kóp. Búginde  Qazaqstan munaı men gazǵa táýeldi bolyp otyr. Ol qupııa emes.  Biz sonyń saldarynan qyzmet kórsetý salasyna baǵdarlanǵan ekonomıkamyzdy ártaraptandyra almaı otyrmyz. Indýstrıalandyrý boıynsha baǵdarlama qolǵa alynǵaly beri 7-8 jylda táýeldilik azaıyp keledi. Qyzmet kórsetý salasy ósti. Óńdeý salasyndaǵy ilgerileýdi de baıqap otyrmyz. Munaıdyń baǵasy sharyqtap turǵan kezde de biz basqa salalardy damyta aldyq. Ol kezde jylyna 60 mln tonna munaı óndiretinbiz. Qazir barreli 50-60 dollar bolsa da sol munaı kólemin shyǵaramyz. Bul ózgerister el ekonomıkasyna yqpalyn tıgizip otyr. Jaǵdaıdy turaqtandyrýǵa tyrysyp jatyrmyz», - dedi Tımýr Súleımenov.

Onyń aıtýynsha, ekonomıkany ártaraptandyrýdyń taǵy bir problemasy Qazaqstannyń klımaty men alys qashyqtyqta ornalasýy bolyp otyr.

«Biz ınfraqurylymdy damytýǵa kóp aqsha jumsap jatyrmyz. Munaıdy tasymaldaý, jetkizý, Eýropaǵa qaraǵanda qymbatyraq. Tas joldary men kólik toraptarynyń jaǵdaıy qanaǵattanarlyq, kóp shyǵyndy talap etedi. Kórshilerimizben tyǵyz baılanystamyz. Almaty men Oraldan góri kórshiles elderdiń jaqyn ornalasqan qalalary tyǵyz baılanysta», - dedi QR Ulttyq ekonomıka mınıstri.

Sondaı-aq, sheneýnik alda atqarylýy tıis mindetterdi de aıtyp ótti.

«Qazaqstan Úkimetiniń baǵdarlamalary men damý strategııalarynda Ekonomıkalyq yntymaqtastyq jáne damý uıymy ókilderi aıtqan máseleler túgel qamtylǵan. Ol ekonomıkany ártaraptandyrý, sannan sapaǵa kóshýge basymdyq berý. Óńirlerge ákimshilik jáne retteýshilik resýrstardy berý múmkindikteri qarastyrylǵan»,- dedi Súleımenov.

Aıta ketý kerek, Almatyda QR Premer-Mınıstri Baqytjan Saǵyntaevtyń qatysýymen Ekonomıkalyq yntymaqtastyq jáne damý uıymynyń Eýrazııa aptalyǵy ótip jatyr.