«Sýymyz sarǵysh tústi»: ShQO-daǵy kent halqy aýyz sýdyń sapasyzdyǵyna shaǵymdandy
ÓSKEMEN. KAZINFORM – Shyǵys Qazaqstan oblysy Shemonaıha aýdany Pervomaıka kentiniń turǵyndary tozyp turǵan ortalyqtandyrylǵan qubyrlardyń saldarynan aýyzsýdyń sarǵysh tartyp, sapasy nasharlap ketkenin aıtyp shaǵymdandy. Kazinform tilshisi máseleniń mánisine úńilip kórdi.
«Aýyzsýdy dúkennen alýǵa májbúrmiz»
Búginde Pervomaıka aýyldyq okrýginde 4 myńnan astam adam turady. Okrýg quramynda Pervomaıka kenti, Barashkı men Novo-Ilınka aýyldary bar. Kezinde tirshiligi qyj-qyj qaınaǵan mekenniń jyl ótken saıyn kerisinshe bazary tarqap, halqy azaıyp keledi. Sońǵy 5 jylda 700-ge jýyq adam basqa jaqqa kóship ketken.
Keńes úkimeti kezinde munda Ertis hımııa-metallýrgııa zaýyty bolǵan. Qazaqstan táýelsizdik alǵannan keıin kóp uzamaı jabylyp, jumyssyz qalǵan jurt jappaı qalaǵa bet túzedi. «Aýyzsý máselesi sheshilmese kósh toqtamaıdy» deıdi turǵyndar.
- Qazir bizdi tolǵandyryp otyrǵan másele – aýyzsýdyń sapasyzdyǵy. Tozyp turǵan ortalyqtandyrylǵan qubyrlardyń saldarynan sýymyz sarǵysh tústi. Ony eshkim ishpeıdi de. Úı sharýasyna, kir men ydys jýýǵa ǵana paıdalanamyz, - deıdi kent halqy.
Sondyqtan jergilikti jurt aýyzsýdy dúkennen satyp alyp ishýge májbúr.
- Ákimdikke aıtyp kele jatqanymyzǵa talaı jyl boldy. Alaıda áli kúnge deıin nátıje joq. Dúkennen kún saıyn sý alý – qaltamyzǵa da salmaq!, - dep olar narazylyqtaryn bildirdi.
Joba túzetýge jiberilgen
Kazinform tilshisi halyqtyń shaǵymyna bıliktiń berer jaýabyn bilip kórdi. Shemonaıha aýdanynyń turǵyn úı-kommýnaldyq sharýashylyq, jolaýshy kóligi jáne avtomobıl joldary bóliminiń málimetine súıensek, 2023 jylǵy jeltoqsanda «Shyǵys Qazaqstan oblysy Shemonaıha aýdanynyń Pervomaıka kentiniń sýmen jabdyqtaý júıesin rekonstrýktsııalaý» uzaq merzimdi jobasyn iske asyrý úshin Óskemen qalasyndaǵy «Hamır StroıMontaj» JShS-men shart jasalǵan.
- Merdiger uıym materıaldar satyp aldy. Kesh qarjylandyrýǵa baılanysty (2024 jylǵy qyrkúıek) aýa raıy jaǵdaılaryn eskere otyryp, merdiger uıym jobany iske asyrýǵa kirispedi. «HamırStroıMontaj» JShS hatyna sáıkes jobany iske asyrý barysynda ony túzetýdi jáne smetalyq qunyn arttyrýdy talap etetin qosymsha faktorlar anyqtaldy. Bul óz kezeginde jumystardy oryndaý merzimine áser etti. Cóıtip, joba túzetýge baǵyttaldy, - dep habarlady bólimnen.
Áli osy túzetý jumystary aıaqtalmaǵan. Bıyl da jobany iske asyrý maqsatynda oblystyq bıýdjetten qarajat bólinipti.
- Dese de «2025 jylǵa arnalǵan respýblıkalyq bıýdjet kórsetkishterin túzetý týraly» Qazaqstan Respýblıkasy Úkimetiniń 2025 jylǵy 8 mamyrdaǵy № 314 qaýlysyna sáıkes respýblıkalyq bıýdjetke salyq túsimderiniń tolyq túspeýi sebebinen aqsha qarajaty qaıta alynǵan, - delingen aýdandyq turǵyn úı-kommýnaldyq sharýashylyq, jolaýshy kóligi jáne avtomobıl joldary bóliminiń resmı jaýabynda.
ıAǵnı, bólingen aqsha qaıta alynǵandyqtan ázirge jobanyń naqty iske asyrylatyn ýaqyty ázirge belgisiz. Al jurttyń qalaǵa qaraı kóshin toqtatý maqsatynda bıyl qandaı jumystar atqarylatynyn Pervomaıka kentiniń ákimi Janat Tastenova aıtyp berdi.
- 2025 jyly Pervomaıka aýyldyq okrýginiń kóshelerindegi jaryqshamdar jaryqdıodty shamdarǵa aýystyrylady. Pervomaıka kentindegi Jambyl kóshesiniń joly ortasha jóndeýden ótedi. Novaıa kóshesi boıynsha trotýar ornatylyp, Novo-Ilınka aýylynda balalar alańy salynady, - deıdi ol.
Eske salsaq, osyǵan deıin Shyǵys Qazaqstanda shekaradaǵy aýyl «qytaı ınternetin» paıdalanyp otyrǵany jaıly jazǵanbyz.