Sýǵa ketkenderdiń sany 22%-ǵa azaıdy – TJM

ASTANA. KAZINFORM – Qazaqstanda shomylý maýsymynyń qorytyndysy boıynsha qabyldanǵan keshendi sharalardyń arqasynda 276 adamnyń ómiri qutqaryldy, dep habarlady Tótenshe jaǵdaılar mınıstrligi.

Vedomstvonyń málimetinshe, 2025 jylǵy shomylý maýsymynda memlekettik jáne jergilikti atqarýshy organdardyń úılesimdi jumysy nátıjesinde qaıǵyly oqıǵalar sany ótken jylmen salystyrǵanda 22 paıyzǵa azaıǵan.

Elimizde sý jaǵasynda demalýǵa arnalǵan 722 resmı oryn uıymdastyryldy. Onyń ishinde 245 kommýnaldyq, 464 jekemenshik jaǵajaı jáne sport pen týrızmge arnalǵan 13 arnaıy alań bar. Shomylýǵa tyıym salynǵan ýchaskelerge erekshe kóńil bólinip, 5 021 qaýipti jerge 6 730 belgi qoıyldy. Sondaı-aq, 201 mobıldi qutqarý beketi ornalastyryldy.

- Qaýipsizdikti kúsheıtý maqsatynda on óńirde jaǵalaý syzyqtary beınebaqylaýmen qamtylyp, jazbalar TJD kezekshi bólimine jiberiledi. Almaty men Qonaev qalalaryndaǵy kommýnaldyq jaǵajaılarda jasandy ıntellekt kómegimen qaýipsizdik aımaǵynyń buzylýy anyqtalyp, dybystyq eskertý dabyly qosylady, - delingen aqparatta.

Aldyn alý sharalary aıasynda Іshki ister mınıstrligi jáne volonterlerdiń qatysýymen 78 myńnan astam reıd pen patrýldeý júrgizildi. Sýdaǵy tártip erejelerin buzǵan 7 myńnan astam azamat ákimshilik jaýapqa tartyldy. Sonymen qatar halyqpen túsindirý jumystary, alǵashqy kómek kórsetý sabaqtary men oqýshylarǵa arnalǵan trenıngter ótkizildi.

Nátıjesinde shomylý maýsymynda 276 adamnyń, onyń ishinde 85 balanyń ómiri qutqaryldy.

Aıta keteıik, Jetisýda jaz mezgilinde 4 adam sýǵa batyp ketken, onyń ekeýi bala.