Sýdyń aqysy jańa ádisteme boıynsha óspeıdi
ASTANA. KAZINFORM – 1 qarashadan bastap sýmen jabdyqtaý jáne sý burý qyzmetteriniń kólemin esepteý boıynsha jańa ádisteme kúshine enedi. Bul týraly Ónerkásip jáne qurylys mınıstrligi habarlady.
– Keıbir BAQ ókilderi jańa esepteý tártibi engizilgennen keıin qazaqstandyqtar kórshileriniń esebinen sýdy qymbattyraq tóleıdi dep habarlaǵan edi. Alaıda Ónerkásip jáne qurylys mınıstrligi bul aqparatty joqqa shyǵaryp, alańdaýǵa negiz joq ekenin málimdedi. Qabyldanǵan ádisteme jańa tólem túrlerin engizbeıdi jáne sý úshin tólem mólsherin arttyrmaıdy, - delingen habarlamada.
Mınıstrliktiń túsindirýinshe, qujattyń maqsaty – sýdy jetkizý jáne burý kólemin anyqtaýdyń biryńǵaı erejelerin belgileý. Burynǵydaı tólem sý eseptegish quraldarynyń kórsetkishteri boıynsha júrgiziledi, ıaǵnı tutynýshy men sý arnasy jelileriniń shekarasynda ornatylǵan qurylǵy derekteri negizge alynady. Al eseptegishi joq tutynýshylar úshin tólem mólsheri ákimdik bekitken tutyný normalary boıynsha esepteledi.
Kóppáterli turǵyn úılerdiń turǵyndary úshin de esepteý tártibi ózgermeıdi. Eger úıde jalpy úılik sý eseptegish ornatylyp, keıbir páterlerde jeke eseptegishter bolmasa, onda jalpy úılik jáne jeke kórsetkishter arasyndaǵy aıyrmashylyq kondomınıým qatysýshylary arasynda proportsıonaldy túrde bólinedi. Mundaı tártip burynnan qoldanysta bolǵan, endi túsinbeýshilikterdiń aldyn alý úshin ol jańartylǵan ádistemede naqty bekitilip otyr. Osy ádistemeni qabyldaý sýmen jabdyqtaý jáne sý burý qyzmetterine aqy tóleýdiń ulǵaıýyna ákelmeıdi.
– Ádisteme tólem qaǵıdattaryn ózgertpeıdi. Ol tek júıeni barynsha ashyq etedi. Eseptegishi bar tutynýshy tek óz tutynǵan sýy úshin tóleıdi, al eseptegishi joqtar bekitilgen norma boıynsha. Jalpy úılik jáne jeke eseptegishter arasyndaǵy aıyrmashylyq – ortaq úı qajettilikteri, al ol eshqandaı qatelik te, aıyppul da emes. Jasyryn qosymsha tólem bolmaıdy. Mundaı esepteý tártibi burynnan bar edi, - dedi Qurylys jáne turǵyn úı kommýnaldyq sharýashylyq isteri komıteti tóraǵa orynbasary Nursultan Kerimqulov.
Demek, jańa ádisteme turǵyndar úshin eshteńeni ózgertpeıdi: tek qoldanystaǵy tájirıbeni birizdendirip, ony barsha óńirge túsinikti ári biryńǵaı etedi. Sý aqysy óspeıdi dep kepildik beredi Ónerkásip jáne qurylys mınıstrligi.
Buǵan deıin qandaı kommýnaldyq qyzmetterge baǵany kóterýge moratorıı engizilgenin jazǵan bolatynbyz.