Sýdıa Elbasyna hat jazǵan Erdenaevtyń anasynan sotqa qysym jasamaýdy surady

ALMATY. QazAqparat - Almatyda BJZQ qarjysyn talan-tarajǵa salǵandar isi boıynsha sotta sýdıa eks-tóraǵa Rýslan Erdenaevtyń anasy jazǵan aryz boıynsha sheshim shyǵardy, dep habarlaıdy QazAqparat tilshisi. 

Kúdiktiniń anasy Elbasyna balasyn arashalap alý týraly hat jazǵan.

«Maǵan Erdenaevtyń anasynyń Elbasyna jazǵan haty tústi. Kásibı turǵydan bilikti advokat jazǵan. Osyndaı hattyń avtorlaryna aıtarym, zertteý bitkenshe bıliktiń basynda turǵandarǵa shaǵymdanýdy qoıa turyńyzdar. Bul sotqa jasalǵan qysym dep túsinemin. Belgili bir qylmystyq isti qaraý kezinde sýdıa laýazymdy tulǵalardyń aıtqanyn emes, zań talabyn ǵana negizge alý kerek. Joǵary turǵan quzyrly organdarǵa shyqsańyzdar kásibı bilikti advokat retinde túsindirýlerińiz kerek. Sotqa ondaı talap qoımaý kerek. Osyny eskere júrińizder», - dedi sýdıa Martpek Kákimjanov.
Qazir atalǵan is boıynsha sot isi jalǵasyp jatyr.

Almaly aýdandyq soty 2017 jyldyń 9 qańtarynda «BJZQ» AQ eks-tóraǵasy Rýslan Erdenaevqa, «BJZQ» AQ táýekelderdi basqarý departamentiniń basshysy Musa Baqytovqa, «Alataý Munaı Altyn» AQ baqylaý keńesiniń tóraǵasy Baqytjan Kenjebaevqa, «Býzgýl Argým» JShS dırektory A.Naızaǵarınge qatysty bultartpaý sharasyn taǵaıyndaǵan bolatyn. Keıinirek atalǵan iske qatysy bar degen kúdikpen «Megatransazııa» JShS dırektorynyń orynbasary T. Turtaev pen «BJZQ» AQ basqarma tóraǵasynyń burynǵy orynbasary D. Medetbekov qamaýǵa alynǵan edi.

Sotqa deıingi tergeý oryndary R.Erdenaev pen ózge de tulǵalarǵa menshikke qatysty QR QK 189-babynyń 4-tarmaǵy boıynsha aýyr qylmys jasady dep aıyp taǵyp otyr.

Aıta keteıik, jyl basynda Ulttyq qaýipsizdik komıtetiniń Almaty qalasyndaǵy departamenti BJZQ-nyń quny 5 mlrd teńge bolatyn kelisimshartyn teksergen bolatyn. Ulttyq banktiń qatysýymen «Biryńǵaı jınaqtaýshy zeınetaqy qory» AQ-nyń áreketin tekserý ótken jyldyń 21 jeltoqsanynan bastalǵan.