Sýbsıdııalar túpkilikti nátıjege qol jetkizýge baǵyttalady - AShM
«Sýbsıdııalaý júıesi, eń aldymen, onyń tetikterin ońaılatý jáne baǵyttardy ońtaılandyrý, barlyq sýbektiler úshin teń qoljetimdilikti qamtamasyz etý esebinen reformalanatyn bolady. Budan basqa, sýbsıdııalar túpkilikti nátıjege qol jetkizýge baǵyttalatyn bolady. Sondaı-aq, sýbsıdııa alýshylar naqty ındıkatıvtik kórsetkishterge qol jetkizý úshin tıisti mindettemelerdi qabyldaıtyn norma engiziledi.
Munymen qosa, sýbsıdııalar berý tetigin odan ári jetildirilý máselesi tsıfrlandyrýdyń jańa platformasyn engizý arqyly júzege asyrylady. Eń mańyzdysy, bul qyzmet sharýalar úshin aqysyz túrde kórsetiledi», - dedi E. Qarashókeev «Aýyl sharýashylyǵyn damytýdyń ózekti máseleleri men perspektıvalary» taqyrybyna arnalǵan parlamenttik tyńdaýda.
Onyń aıtýynsha, osy isterdi atqarý maqsatynda mınıstrlikte arnaıy jumys toby quryldy. Oǵan salalyq qaýymdastyqtar men odaqtardyń, agrobıznestiń, ǵylymnyń, múddeli memlekettik jáne jergilikti atqarýshy organdardyń, onyń ishinde sybaılas jemqorlyqqa qarsy qyzmettiń ókilderi de kirdi.
«Qoryta kelip aıtqanda, sýbsıdııa tetikterin jetildirý jumystary bizge onyń ekonomıkaǵa tıgizer áserin baǵalaýǵa, sýbsıdııa alý protsessterine adamı faktorlardyń yqpalyn meılinshe azaıtýǵa jáne de memlekettik qoldaýdyń turaqtylyǵyn saqtaýǵa qol jetkizetin bolady», - dedi mınıstr.
Budan buryn habarlanǵandaı, E. Qarashókeev salany memlekettik qoldaý máselelerinde de eleýli kemshilikter bar ekenin aıtty.
Eń aldymen, bul sýbsıdııalaý tetikteriniń kúrdeliligi, sýbsıdııa alýdyń sharttarynyń kóptigi. Sonymen qatar sýbsıdııalar negizinen iri bıznes sýbektilerine jáne de tehnologııalyq protsesterdi qoldaýǵa baǵyttalǵan.
