Sýarmaly egistikterge sý tarıfterin belgileýdiń jańa ádistemesi ázirlenedi

ASTANA. KAZINFORM — Sý únemdeý tehnologııalary boıynsha tarıfter saralanyp belgilenedi. Bul týraly QR Sý resýrstary jáne ırrıgatsııa mınıstri Nurjan Nurjigitov málim etti.

- Sýdy únemdi paıdalanýdy yntalandyrýda tarıftik saıasat sheshýshi ról atqarady. Osyǵan oraı qazirgi tańda sýarmaly sýdyń tarıfterin belgileýdiń jańa ádistemesi ázirlenip jatyr. Jańa tásil boıynsha tarıfter aýyl sharýashylyǵy daqyldarynyń túrlerine, tutynylatyn sýdyń kólemine, sondaı-aq sý únemdeý tehnologııalarynyń qoldanysyna qaraı saralanyp belgilenetin bolady. Bul shara sýdy utymdy paıdalaný men únemdeýge yntalandyrýdy kúsheıtýge baǵyttalǵan, - dedi N. Nurjigitov Parlament Májilisindegi sý sharýashylyǵy salasyn reformalaý taqyrybyndaǵy Úkimet saǵatynda.

Onyń aıtýynsha, bul rette Memleket basshysynyń sýarmaly sý qyzmetterine tarıftik saıasatty jetildirý jónindegi tapsyrmasyna sáıkes, Sý resýrstary mınıstrligine Ulttyq ekonomıka mınıstrliginen sýarmaly sýǵa tarıftik retteýish fýnktsııalary berildi. Osy maqsatta Ulttyq ekonomıka mınıstrligimen birlese otyryp, «az tutynsań — soǵurlym az tóleısiń» qaǵıdatyna negizdelgen aýyz sýǵa saralanǵan tarıfter júıesi engizildi.

- Bul júıe halyqty sý resýrstaryn uqypty paıdalanýǵa yntalandyryp, tutyný kólemine qaraı ádil ári únemdi tólem tártibin qamtamasyz etýge baǵyttalǵan. Aldyn ala derekter boıynsha alty óńirde (Almaty, Shymkent qalalary, Aqmola, Túrkistan, Ulytaý, Aqtóbe oblystary) saralanǵan tarıfterdi engizý nátıjesinde aı saıyn orta eseppen 1,6 mıllıon tekshe metr sý únemdelip otyr. Bul arqyly shamamen 900 mıllıon teńge kóleminde qarajat jınalyp, ol sý qubyry jelilerin jańǵyrtýǵa baǵyttalady, - dedi mınıstr.

Budan buryn habarlanǵandaı, Qazaqstanda sý únemdeýge múmkindik beretin majarlyq preparatty synaqtan ótkizýdiń alǵashqy kezeńi aıaqtaldy.