Sý alý lımıti: Ereje buzǵan sharýalarǵa qandaı shara qoldanylady

ASTANA. KAZINFORM — Úkimet kúni keshe 5 oblysqa arnalǵan sý paıdalaný shegin belgilegen edi. Egin sýarýda ony saqtamaǵan azamattarǵa aıyppul salynady. Bul jóninde QR Sý resýrstary jáne ırrıgatsııa vıtse-mınıstri Erbolat Ibraıhanov málimdedi.

Sý lımıti qoıylǵan aımaqtardy eske salsaq, Qyzylorda oblysy úshin 3,2 mlrd tekshe metr, Almaty oblysy — 2,1 mlrd tekshe metr, Jetisý oblysy — 1,8 mlrd tekshe metr, Jambyl oblysy — 1,2 mlrd tekshe metr, Túrkistan oblysy úshin 3,8 mlrd tekshe metr sý shegi bekitilgen.

— Atalǵan óńirlerde sý alýǵa lımıtti engizip qana qoımaı, sharýalar men «Qazsýshar» RMK arasynda kelisimshart jasalady. Qujatta sharýalardyń qandaı daqyl egetini jáne qansha sý paıdalanatyny jazylady. Eger kelisimshartta kórsetilgen mólsherden artyq sý paıdalansa, Tabıǵı monopolııalardy retteý zańy boıynsha, sharýaǵa 20% kóleminde aıyppul salynady, — dedi E.Ibraıhanov.

Sonymen qatar, ol erejeni saqtamaǵan dıqandarǵa qoldanylatyn basqa da sharalardy túsindirdi.

— Eger sharýa júgeri egemin dep kúrish ekse, 50% ústemaqy tóleıdi. Al eger kelisimshartsyz egin ekse, belgilengen somadan 100% artyq tóleıdi. Bul — bir shara. Sonymen qatar, erejeni buzǵan sharýalardyń sýbsıdııa alýynda qıyndyqtar týyndaıdy. Úshinshiden, kelisimsharttaǵy kólemnen artyq egin egip, sý jetpese, sý tasymaldaýshy retinde biz oǵan jaýap bere almaıtynymyzdy sharýalar túsinýi qajet. Sondyqtan, mysaly, Qyzylorda oblysynda 70 myń gektar kúrish egiledi dep bekitildi me, sodan aspaýy kerek, — dedi vıtse-mınıstr.

Sondaı-aq ol sý lımıti saqtalýy qatań qadaǵalanatynyn atap ótti.

Aıta keteıik, buǵan deıin sý arnalaryn tsıfrlandyrý sýarmaly sýdyń baǵasyn qymbattatpaıtynyn jazǵanbyz.