Sý tasqynynan zardap shekkenderge 43 mln teńgeniń kómegi kórsetildi - SQO
Qarjyny Qazaqstannyń Qyzyl Jarty aı qoǵamy, Bolat Ótemuratov qory jáne Fortebank bólip otyr. 43 mln teńge Esil ózeni tasyǵan kezde saıajaı ýchaskelerin sý basqan 861 turǵynǵa bólip beriledi.
Qazaqstannyń Qyzyl Jarty aı qoǵamy SQO fılıalynyń málimetinshe, qarjy berilmes buryn qoǵamnyń áreket etý toby Petropavl qalasy mańyndaǵy saıajaı ýchaskelerin aralap, halyqpen kezdesti, máselege qanyqty.
Járdemaqy sý tasqyny kezinde úıleri aıtarlyqtaı zaqymdanǵan turǵyndarǵa - kópbalaly jáne tolyq emes otbasylarǵa, jalǵyzbasty zeınetkerlerge, múgedekterge beriledi.
Ár otbasy múshesine shotynda 50 myń teńgesi bar bank kartasy beriledi. Osylaısha, 224 otbasynyń 861 múshesi járdemaqy almaq.
Bul qarajatty olar qajettiligine qaraı jumsap, ıaǵnı azyq-túlik, dári-dármek, turmystyq zattar men qurylys materıaldaryn alady.
«Bizge jylda kómek kórsetiledi. Bıyl da qol ushyn sozyp, járdemaqy berip jatqandaryna alǵysymyz sheksiz. Tek biz ǵana emes, barlyq Qazaqstan boıynsha járdem alyp jatyr», - deıdi sý tasqyny kezinde saıajaıy sý astynda qalǵandar.
Buǵan deıin Qazaqstannyń Qyzyl Jarty aı qoǵamy Qostanaı oblysy Qarasý aýdanynyń 200 turǵynyna 10 mln teńge kóleminde kómek kórsetti.
Qaramyrza, Jeleznodorojnoe jáne Molodejnoe eldi mekenderiniń turǵyndary qyzyl sýdan zardap shekken edi.
«Kómek alyp jatqan turǵyndardyń basym bóligi maýsymdyq jumystarda eńbektenedi, ıaǵnı jaǵdaılary onsyz da máz emes. Biz bergen qarjy olardyń qıyndyqty tezirek jeńýine, tasqyn sýdan zardap shekken múlikterin orynyna keltirýge kómektesedi dep oılaımyn. El boıynsha jaǵdaıdy baqylaýda ustap otyrmyz, otandastarymyzǵa kómek kerek bola qalsa, jedel túrde járdemdesemiz», - deıdi Bolat Ótemuratov qorynyń dırektory Marat Aıtmaǵanbetov.
«Kómek kartasy» jobasy 2018 jyldan beri júzege asyp keledi.
Sodan beri tabıǵı jáne tehnogendi apattarda zardap shekken 8 myńnan astam adamǵa 300 mln teńgeniń kómegi kórsetilgen.
Bıyl SQO, Qostanaı oblystarynyń jáne Shymkent qalasy Eńbekshi aýdanynyń 398 otbasyna járdem berildi.
