Sý tasqynymen kúres: Úkimet Shyǵys Qazaqstanǵa 2 mlrd teńge bóledi

ASTANA. QazAqparat - Shyǵys Qazaqstan oblysynda sý tasqynymen kúres jumystaryna Úkimet tarapynan 2 mlrd teńge qosymsha qarjy bólinedi. Bul týraly búgin Úkimet otyrysynda Premer-Mınıstr Baqytjan Saǵyntaev aıtty, dep habarlaıdy QazAqparat.

Premer-Mınıstrdiń aıtýynsha, Úkimet tarapynan Shyǵys Qazaqstan oblysyna qajetti kómektiń barlyǵy kórsetiletindigin basa aıtty.

«Danıal Kenjetaıuly (ShQO ákimi Ahmetov) Sizdiń jazǵan hatyńyz kelip tústi. Qosymsha qarajat bólinetin bolady. Kómek retinde 2 mlrd teńge suraldy. Baqyt Turlyhanuly (Qarjy mınıstri Sultanov) sheshimderdi shuǵyl túrde daıyndańyz. Asqar Uzaqbaıuly (Úkimet basshysynyń birinshi orynbasary Mamın) jalpy respýblıka boıynsha osy kúrdeli jaǵdaı baqylaýyńyzda bolsyn», - dedi Baqytjan Saǵyntaev.

Al Danıal Ahmetovtiń aıtýynsha, búgingi kúni oblystyń tórt aýdany Aıagóz, Glýbokoe, Zyrıan, Shomonaıha men Semeı qalasynda tabıǵı sıpattaǵy tótenshe jaǵdaı jarııalanǵan. Barlyq másele meniń turaqty baqylaýymda. Sý basqan jerlerde 570 qural-jabdyq jumyldyrylǵan. Arnaıy qurylǵan komıssııa shyǵyndy eseptep jatyr. Qoǵam ókilderimen qosymsha 3107 adam tartyldy. Qazirgi kezde úılerdi qalpyna keltirý, jóndeý boıynsh jumys bastalyp ketti. Osyndaı jumysty kúndelikti atqaryp jatyrmyz», - dedi oblys basshysy.

Onyń aıtýynsha, Zyrıanda sońǵy 60 jyla mundaı sý tasqyny bolmaǵan. Buqtyrma ózeninde muzdyń qalyńdyǵy 2 metrge jetken.

«Qazir muz jarý jumystaryn júrgizip jatyrmyz. Biraq, búgin aýa raıy buzylyp, Óskemende de, Zyrıanda da qar jaýyp jatyr», - dedi Danıal Ahmetov.