Sý tasqynynyń saldary: Atyraýda kásipkerdiń jer telimine bóget salynǵan

ATYRAÝ. KAZINFORM – Atyraý oblysynyń kásipkerleri byltyrǵy sý tasqynynyń saldaryn áli tartyp otyr. Bóget salý kezinde kásipker Vıacheslav Orlovtyń jer telimi ekige bólingen. 

Kásipkerdiń aıtýynsha, 2022 jyldyń qazan aıynda Mahambet aýdanyndaǵy Beıbarys aýylynan 2,7 gektar jer telimin jeke ıeligine alǵan. Qus fabrıkasynyń qurylysyn júrgizý úshin byltyrǵy jyldyń basynda jer telimin qorshaǵan. Jeri telimine transformatorlyq qosalqy stansa ornatqan. 

– Alaıda ótken jylǵy sý tasqynynan qorǵaý úshin salynǵan jer telimimdi bóget ekige bólip tastady. Biraq meniń ıeligimdegi jer telimine bóget salý týraly eshkim habarlaǵan joq. Men bóget salýǵa ruqsatymdy bermedim. Bóget úshin qoldanylǵan topyraq úıindisinen jer telimin qorshaýǵa salǵan 38 beton baǵanasy búlindi. Qazir ıeligimdegi jer telimi ekige bólinip tur. Sol sebepten bıznes josparymdy bastaı almaı otyrmyn, - deıdi Vıacheslav Orlov. 

Onyń aıtýyna qaraǵanda, osy máseleni oń sheshý úshin birneshe ákimdikke júgingen. Naqtylaı aıtqanda, Beıbarys aýyldyq okrýginiń, Mahambet aýdandyq jáne Atyraý qalalyq ákimdigine hat jazǵan. 

– Biraq tuşymdy jaýap almadym. Olar tek meniń hatymdy bir-birine jiberip otyr. Amalym taýsylǵan soń Atyraý oblysynyń kásipkerler palatasyna júgindim, -dep málim etti Vıacheslav Orlov. 

Mahambet aýdandyq jer qatynastary bóliminiń basshysy Aqylbek Sálıevtiń málimetinshe, sý tasqyny saldarynan zardap shekken kásipkerlerdiń tizimi jasaqtalǵan. Alaıda shaǵym aıtqan kásipkerdiń jer telimi arqyly salynǵan bóget Atyraý qalalyq ákimdigi tapsyrysymen júrgizilgen. 

– Bizdiń aýdannan sý tasqyny kezinde shamamen 105 kásipkerlik sýbektisi zardap shekti. Qazir olarǵa ótemaqy tóleý jumysy júrgizilip jatyr. Zardap shekken kásipkerlerdiń arasynda Vıacheslav Orlov joq. Óıtkeni bizdiń balansqa onyń jer telimi arqyly ótetin bóget alynbaǵan, - deıdi Aqylbek Sálıev.

Kásipkerler quqyqtaryn qorǵaý jónindegi ýákildiń Atyraý oblysy boıynsha sektor meńgerýshisi, oblystyq kásipkerler palatasy dırektorynyń orynbasary Sársenbaı Joldybaevtyń pikirinshe, bul iste kásipkerdiń quqyǵy buzý deregi bar. 

– Qoldanystaǵy zańnamaǵa sáıkes túıtkildi máseleni sheshýdiń eki tetigi bar. Birinshisi – kásipkerge ótemaqy tóleý, al ekinshisi – aýmany men quny jaǵynan uqsas basqa jer telimin berý. Osyǵan baılanysty tıisti organdarǵa usynystar jiberiledi. Eger olardyń jaýaby men máseleni sheshý turǵysyndaǵy usynysy kásipkerdi qanaǵattandyrmasa, biz onyń múddesin sotta qorǵaýǵa daıynbyz, - dep málim etti Sársenbaı Joldybaev. 

Eske sala ketelik, buǵan deıin Atyraýlyq kásipkerdiń dúkeninde 3,7 mln teńgeniń alkogoli zańsyz saqtalǵanyn jazǵan edik.