Sý tasqynyna qarsy 5,5 myń áskerı qyzmetshi jumyldyryldy

ASTANA. KAZINFORM – Sý tasqynyna qarsy is-sharalarǵa Qarýly kúshterdiń avıatsııasy jumyldyryldy. Bul týraly QR Qorǵanys mınıstrliginiń resmı ókili Rýslan Jangýlın málim etti.

Qarýly kúshterdiń áskerı qyzmetshileri sý basqan óńirlerdiń turǵyndaryn evakýatsııalaý, sý basý qaýpi bar jerlerdi kúsheıtý, ózenderdiń, kólderdiń jáne kóshelerdiń jaǵasynda qum salynǵan qaptardy nyǵyzdap salý, sondaı-aq sý tasqynynan zardap shekken turǵyndardy aýyz sýmen jáne jaryqpen qamtamasyz etý jónindegi mindetterdi oryndap jatyr.

«Sý tasqynyna qarsy is-sharalarǵa QR Qarýly kúshterinen jalpy 5 441 áskerı qyzmetshi, 227 avtomobıl tehnıkasy, 12 armııalyq avıatsııa tikushaǵy, 5 áskerı-kóliktik avıatsııa ushaǵy jáne 3 ushaq jumyldyryldy. Eldi mekenderden 3 300-den astam adam evakýatsııalandy, 1 238 adam jáne 213 tonna júk tasymaldandy», - dedi R. Jangýlın Ortalyq kommýnıkatsııalar qyzmetindegi brıfıngide.

Onyń aıtýynsha, Qarýly kúshter jeke quramynyń kúshimen ózender, kólder jaǵalaýyna, eldi mekenderdiń mańyna 940 myńnan astam qum salynǵan qap daıyndalyp, bógetter nyǵaıtyldy.

«Jedel shtabtyń sheshimi boıynsha Qarýly kúshterden qosymsha kúshter men quraldar bólindi. Aqtóbe qalasynda dezınfektsııalyq jumystardy jasaý úshin quramynda 50 áskerı qyzmetshi men 17 tehnıkasy bar Taraz garnızonynan radıatsııalyq-hımııalyq jáne bıologııalyq qorǵaý bólimshesi, sondaı-aq Soltústik Qazaqstan oblysyna Qonaev garnızonynyń arnaıy tehnıkasy bar ınjenerlik top bólindi. Jeke quramǵa da, halyqqa da medıtsınalyq kómek jasaý úshin Qarýly kúshterdiń tórt áskerı-medıtsınalyq bólimshesi men mekemelerinen quramynda 57 adamy bar medıtsınalyq brıgadalar, dárilik zattarmen jáne medıtsınalyq buıymdarmen jetkilikti qamtamasyz etilgen 8 sanıtarlyq avtokólik jiberildi», - dedi vedomstvo resmı ókili.