Sý tasqynyna daıyndyq: ShQO-nyń qaı aýdandarynda qalyń qar jatyr

ÓSKEMEN. KAZINFORM – Shyǵys Qazaqstan oblysynda sý tasqynyna daıyndyq jumystary júrgizilip jatyr.

ShQO TJD baspasóz qyzmetiniń málimetinshe, bıyl óńir boıynsha qar jamylǵysy kóp jylǵy ortasha deńgeıden joǵary.

Qar jamylǵysynyń bıiktigi 11 sm-den 136 sm-ge deıingi aralyqta. Oblystyń taýly aýdandarynda normadan joǵary eń kóp qar qory Rıdder qalasynda, Altaı jáne Katonqaraǵaı aýdandarynda baıqalyp otyr. Ózenderdegi muzdyń qalyńdyǵy 12 sm-den 77 sm-ge deıin jetedi.

- Altaı, Úlken Naryn, Katonqaraǵaı, Kúrshim, Shemonaıha, Marqakól aýdandaryndaǵy ózenderde profılaktıkalyq jarylys jumystaryn júrgizý qajet ýchaskeler anyqtaldy. Sý tasqynynyń aldyn alý úshin jaǵalaýdy nyǵaıtý, kanaldardy, aryqtardy, sý ótkizý qurylystaryn, kópirlerdi tazartý jumystary júrgizilýde. Qutqarýshylar sý basý qaýpi tónýi múmkin úılerdi aralap, halyqqa tıisti nusqaýlyq berip jatyr. Sondaı-aq 64 myń dana ydys-qap, 9 myń ınertti jáne 263 tonna janar-jaǵarmaı materıaldary daıyndalǵan, - deıdi departament bastyǵynyń orynbasary Ishar Savazov.

Onyń aıtýynsha, jaǵdaı qıyndap ketse 2511 adam, 935 tehnıka, 46 júzý quraly, 242 motopompadan turatyn arnaıy toptar quryldy. Aımaq boıynsha qalalar men aýdandardyń ákimdikterimen jalpy syıymdylyǵy 21 myńnan asatyn halyqty ýaqytsha ornalastyratyn 182 pýnkt bar.

Eske salsaq, buǵan deıin Shyǵys Qazaqstan oblysynda sý tasqynynyń aldyn alý úshin jasandy ıntellektti qoldanatyn jedel shtab qurylǵany habarlanǵan.