Sý tasqyny jónindegi shtab: Halyqqa barlyq qajetti medıtsınalyq kómek kórsetiledi

ASTANA. KAZINFORM – Sý tasqynyna qarsy is-sharalardy úılestirý jáne sý tasqyny kezeńiniń zardaptaryn joıý jónindegi respýblıkalyq shtab apattan zardap shekken óńirlerdegi halyqqa medıtsınalyq kómek kórsetý máselesin erekshe baqylaýda ustaıdy. 

Medıtsınalyq uıymdar kúsheıtilgen rejımde jumys isteýde, dárigerler men jedel medıtsınalyq járdem brıgadalary qosymsha tartylyp jatyr. Evakýatsııalanǵan adamdardy dárigerler qarap-tekserýde, olardyń jaǵdaıy turaqty, qandaı da bir jaraqat alý týraly shaǵymdar túsken joq. Júkti áıelder men balalardyń jaǵdaıyna baqylaý júrgizilýde. Bosaný ýaqyty taıaǵan áıelder aýdandyq jáne oblystyq ortalyqtarǵa kóshirildi. 

Densaýlyq saqtaý mınıstrliginde jaǵdaıdyń kúndelikti monıtorıngi júrgizilýde. Sý tasqynynan zardap shekken óńirlerdiń turǵyndary úshin medıtsınalyq jáne psıhologııalyq kómektiń qosymsha brıgadalaryn ashý úshin qyzmetterdiń daıyndyǵy qamtamasyz etildi.

Halyqty ýaqytsha jınaý pýnktterinde táýlik boıǵy medıtsınalyq posttardyń jumysy qamtamasyz etildi, dárilik zattar men medıtsınalyq buıymdardyń qajetti qorlary daıyndaldy. Barlyq óńirlerde sanıtarııalyq-epıdemıologııalyq ahýaldy baqylaý jáne monıtorıng kúsheıtildi. Sonymen qatar jergilikti jerlerde densaýlyq saqtaý máseleleri boıynsha baılanys ortalyqtarynyń jumysy biryńǵaı algorıtmmen táýlik boıy jumys isteý rejımine aýystyryldy.

Sý tasqynynan zardap shekken óńirler turǵyndary densaýlyq saqtaý basqarmalarynyń Call-ortalyqtary boıynsha kelesi nómirlerge júgine alady: 

Aqtóbe oblysy ([phone]) 

Qostanaı oblysy ([phone])

Batys Qazaqstan oblysy ([phone])

Qaraǵandy oblysy ([phone])

Abaı oblysy ([phone])

Ulytaý oblysy ([phone])

Aqmola oblysy (109)