Sý tasqyny: Jańadan salynǵan úılerdiń sapasyna kim jaýapty
ASTANA. KAZINFORM – Búginde sý basqan óńirlerde turǵyn úı qurylysy qyzý júrip jatyr. Keıbir óńirlerde baspana paıdalanýǵa berildi. Osy oraıda Ónerkásip jáne qurylys mınıstrliginen jańa úılerdiń ýaqtyly tapsyrylýy men sapasyna jaýapty organdy suraǵan edik.
«Zańnama talaptaryna sáıkes, sapany baqylaý qurylys sýbektilerine, ıaǵnı jobany iske asyrýdyń barlyq kezeńinde júzege asyrylatyn tehnıkalyq qadaǵalaýǵa, (sapasyna, merzimine, qunyna, oryndalǵan jumysty qabyldaýǵa jáne obektilerdi paıdalanýǵa berýge), sondaı-aq oryndalǵan jumystyń bekitilgen jobalaý qujattamasyna jáne qurylys sapasyn menshikti óndiristik baqylaýdyń barlyq túri men nysandaryn júzege asyratyn merdiger uıymǵa sáıkestigin rastaıtyn avtorlyq qadaǵalaýǵa júkteledi», - delingen agenttikke berilgen jaýapta.
Aıta ketsek, atalǵan mınıstrliktiń jaýabynda quzyrly nemese jergilikti atqarýshy organdardyń baqylaý, qadaǵalaý júrgizetini aıtylmaǵan.
Odan bólek, jańa turǵyn úılerdiń qurylysyna respýblıkalyq jáne jergilikti bıýdjetten qansha qarjy bólingenin suraǵan edik.
«2024 jylǵy 12 sáýirdegi Qazaqstan Respýblıkasy Úkimetiniń qaýlysymen Qostanaı oblysynyń, Arqalyq qalasynda tasqyn sýdan zardap shekken 31 otbasyna úı satyp alý úshin QR Úkimetiniń tótenshe rezervinen 405 mln teńge bólindi», - degen jaýap aldyq.
Al basqa óńirler boıynsha qansha qarajat bólingeni belgisiz.
Mınıstrliktiń málimetinshe, tasqyn sýdan zardap shekken 9 óńir boıynsha (Aqmola, Aqtóbe, Atyraý, Batys Qazaqstan, Qostanaı, Qaraǵandy, Pavlodar, Soltústik Qazaqstan, Ulytaý
oblysy) 19 928 turǵyn úı, onyń ishinde 7 635 saıajaıdy sý basqan.
Sondaı-aq, sý basqan úılerge aldymen tehnıkalyq tekserý jumystary júrgiziledi.
Onyń qorytyndysy boıynsha zardap shekken úı avarııalyq bolyp tanylsa, jańadan úı salynady nemese satyp alynady.
