Sý tasqyny zardaby: Bes óńirde 398 úıdiń qurylysy bastaldy
ASTANA. KAZINFORM — Respýblıkanyń 5 óńirinde sý tasqynynan jaramsyz bolyp qalǵan 398 úıdiń ornyna jańa baspananyń qurylysy bastaldy. Bul týraly Ónerkásip jáne qurylys mınıstrliginiń resmı ókili Merýert Ibraeva aıtty.
«Qurylys jáne turǵyn úı-kommýnaldyq sharýashylyq isteri komıtetiniń habarlaýynsha, 5 óńirde — Aqtóbe, BQO, Qaraǵandy, Pavlodar, SQO-da 34 merdiger kompanııa 398 úı salýǵa kiristi. Sonymen qatar, Qostanaı oblysynda ákimdik 31 páter satyp alyp, zardap shekken otbasylarǵa berdi», — dedi ol ortalyq kommýnıkatsııalar qyzmetindegi brıfıngte.
Resmı ókildiń dereginshe, myna óńirlerde úı salý jumystary bastaldy:
— Aqtóbe oblysynda 11 merdiger kompanııa Qobda aýdanynda 89 úı
— Batys Qazaqstan oblysynda 12 merdiger kompanııa Qaratóbe, Syrym jáne Terekti aýdandarynda 203 úı
— Qaraǵandy oblysynda — 1 úı
— Pavlodar oblysynda — 5 úı
— Soltústik Qazaqstan oblysynda 10 merdiger kompanııa 100 úıdiń qurylysyn bastady.
«Sý tasqynynan zardap shekken óńirlerdiń ákimdikteri turǵyn úılerdi qalpyna keltirý úshin merdigerlerdi qamtamasyz etý jumystaryn jalǵastyrýda», — dedi Merýert Ibraeva.
