Sý tasqyny týraly jalǵan aqparat taratqan 29 adam jazalandy
ASTANA. KAZINFORM – Sý tasqyny týraly jalǵan aqparat taratqan 29 adam jazalandy. Bul týraly Májilis depýtattarynyń saýalyna Premer-Mınıstr Oljas Bektenovtiń jaýabynda aıtylǵan.
«Jalǵan aqparattardyń aldyn alý jáne anyqtaý maqsatynda BAQ pen áleýmettik jelilerge únemi monıtorıng júrgiziledi. Monıtorıng barysynda jalǵan jáne teris aqparat taratýdyń 41 faktisi anyqtalyp, olardy ókiletti organdar teriske shyǵardy. Jalǵan aqparat taralýynyń 6 derekkózi anyqtaldy. Olar boıynsha onlaın-platforma ıeleriniń atyna zańǵa qaıshy materıaldardy joıý týraly talappen habarlandyrý jiberildi», - dep atap ótedi Úkimet basshysy jaýabynda.
Sonymen qatar ol mundaı habarlama sý tasqynyna qatysty jalǵan aqparat taratýshylardy ákimshilik jaýapkershilikke tartý máselesin qarastyrý úshin Іshki ister mınıstrligine de jiberilgendigin eskertedi.
«Jalǵan aqparattardyń basym bóligi messendjerlerde feık habarlamalardyń taratylýymen baılanysty. Jalǵan aqparat ornalastyrǵany úshin 29 tulǵa (6 adam tutqyndaldy, 2 fakti boıynsha sotqa deıin tergeý júrgizilip jatyr, qalǵandaryna aıyppul salyndy) jaýapqa tartyldy. Munan bólek, zańǵa qaıshy sıpattaǵy 92 jarııalanym quqyqtyq baǵa berý úshin Bas prokýratýraǵa jiberildi. Atalǵan materıaldardy jarııalaǵan áleýmettik jeli qoldanýshylarmen profılaktıkalyq áńgimelesý júrgizildi», - dedi Oljas Bektenov.
