Sý tasqyny: SQO-ǵa 5 óńirden qutqarýshylar keldi

ASTANA. KAZINFORM – Soltústik Qazaqstan oblysynda 76 úı áli de sý astynda, 600-den astam adam evakýatsııalandy. Bul týraly óńir ákiminiń orynbasary Qanat Dúzelbaev aıtyp berdi.

«Sergeev sý qoımasynyń tolymdylyǵy tómendep keledi. Qazirgi saǵatta sýdyń tolymdylyǵy 179,5% kórsetti, kóterilýi – 412 sm, bul keshegi kúnmen salystyrǵanda 13 sm-ge tómen», - dedi Q. Dúzelbaev Ortalyq kommýnıkatsııalar qyzmetinde ótken baspasóz máslıhatynda.

Onyń aıtýynsha, 103 úıdiń 76-sy áli de sý astynda qalyp otyr. 676 adam evakýatsııalandy, 44 adam úıge qaıtaryldy jáne 174 úıdiń mańyna sý kirgen.

Sonymen birge, aımaqqa Ulytaý, Túrkistan, Qaraǵandy jáne Pavlodar oblystarynan jáne Almaty qalasynan TJM kúshteri kelgen.

«Oblysta 59 joldy sý shaıdy, 19 jolda áli sý bar. 8 ýchaskede jol jabynyna zaqym keldi. Qazir sý sorǵytý, aryqtardy tazartý, kanaldardy keńeıtý, qapshyq tóseý jumystary júrgizilýde. Petropavl qalasy men Qyzyljar aýdanyndaǵy eldi mekender aınalasyndaǵy qorǵanysh úıindilerin nyǵaıtý jalǵasýda», - dedi spıker.

Sondaı-aq, tasqynnan kelgen shyǵyndy óteý týraly 11 ótinish kelip túsken, qazir baǵalaý jumystary júrip jatyr.