Sý tasqyny: Polıtsııa qaraýsyz múlikti kúzetý úshin 45 eldi mekendi qorshaýǵa aldy
ASTANA. KAZINFORM – Sý tasqyny jaǵdaıynda azamattar qaýipsizdigin qamtamasyz etý úshin tártip saqshylary kúsheıtilgen rejımde qyzmet etýde. Bul týraly QR Іshki ister mınıstrligi Ákimshilik polıtsııa komıtetiniń tóraǵasy Qaısar Sultanbaev aıtyp berdi.
Qutqarý jáne sý tasqynyna qarsy is-sharalarǵa 4 myńnan astam polıtsııa qyzmetkeri men Ulttyq ulannyń áskerı qyzmetshileri, sondaı-aq ІІM oqý oryndarynyń kýrsanttary qatysýda.
«Patrýldik kólikter, avtobýstar, júk kólikteri jáne vedomstvolyq tikushaqtar men ushaqtar sekildi 700 qyzmettik tehnıka jumyldyryldy. Іshki ister organdarynyń qyzmetkerleri Tótenshe jaǵdaı mınıstrligi men jergilikti organdarǵa aryqtardy tazartýǵa kómektesýde. Jalpy polıtsııa qyzmetkerleri men Ulttyq ulannyń áskerı qyzmetshileri 10 myń metrge jýyq aryqty tazartty, 159 myńnan astam qum salynǵan qap tósedi», - dedi Q. Sultanbaev Ortalyq kommýnıkatsııalar qyzmetinde ótken baspasóz máslıhatynda.
Sý tasqyny kezinde QR ІІM 16 300 adamdy qutqarǵan. Tikushaqpen 325 adam, onyń ishinde 111 bala evakýatsııalanǵan.
Sondaı-aq, qaraýsyz qalǵan múlikti kúzetý úshin polıtsııa 45 zardap shekken eldi mekendi qorshaýǵa aldy. Olar – Aqtóbe oblysynda Aqtóbe qalasy men Oıyl aýdany; Atyraý oblysynda – Jylyoı aýdany (Qulsary qalasy); BQO – Oral qalasy, Bórli, Báıterek, Qaratóbe, Syrym, Terekti aýdandary; Pavlodar oblysynda – Sharbaqty aýdany; Soltústik Qazaqstan oblysynda – Taıynsha aýdany; Qostanaı oblysynda – Qostanaı jáne Rýdnyı qalalary, Qostanaı, Qarasý, Fedeorovka jáne B.Maılın aýdandary; Ulytaý oblysynda – Ulytaý aýdany;
«Qazir Іshki ister organdary 9 600-den astam qaraýsyz qalǵan turǵyn úı men basqa da nysandardy kúzetýde. Urlyq-qarlyqqa jol berilmedi», - dedi spıker.
