Sý tasqyny: Petropavlǵa aýyz sý poıyzben jetkizildi
ASTANA. KAZINFORM – Sý tasqynyna ushyraǵan Petropavl qalasynyń turǵyndaryn taza aýyz sýmen qamtý týraly Saýda jáne ıntegratsııa mınıstrligi Saýda komıteti tóraǵasynyń orynbasary Ernur Jáýtikbaev aıtyp berdi.
«Búginde sý tasqynynan zardap shekken óńirlerde baǵa jaǵdaıy turaqty, azyq-túlik jetkizýde kedergi joq. Áleýmettik mańyzy bar azyq-túlik baǵasynyń ósýi baıqalmaıdy. Sý basqan óńirlerde kún saıyn saýda obektilerine monıtorıng júrgiziledi. Aıtar bolsaq, Petropavl qalasyna qalaǵa sý berýdiń buzylýyna baılanysty kún saıyn «Magným» saýda jelisi jáne dıstrıbıýtorlyq kompanııalarmen qala halqyn aýyz sýmen qamtamasyz etý uıymdastyryldy», - dedi Ernur Jáýtikbaev Ortalyq kommýnıkatsııalar qyzmeti alańynda ótken baspasóz máslıhatynda.
Sondaı-aq, Petropavlǵa jetetin avtojoldardy sý basyp, qozǵalystyń shektelýine baılanysty Saýda mınıstrligi «Qazaqstan temir joly» ulttyq kompanııasy basshylyǵymen birlesip aýyz sýdy poıyzben jetkizgen.
«Kókshetaý mıneraldy sýlary» AQ-men 5 lıtrlik bótelkege (táýlik boıy) sý quıýǵa jáne jedel jetkizý jóninde ýaǵdalastyqqa qol jetkizildi. Soltústik Qazaqstan oblysynyń Saýda departamentiniń málimetinshe, sý jetkizýde problema joq, barlyq qatynas baǵyty ashyq jáne kedergisiz júrgizilýde», - deıdi ol.
