Sý tasqyny: Oralda saıajaıdan qutqarylǵan ıtter qaıda ornalastyryldy
ORAL. KAZINFORM — Oral qalasynda saıajaılardan qutqarylǵan ıtter Jáńgir han atyndaǵy Batys Qazaqstan agrarlyq-tehnıkalyq ýnıversıteti janyndaǵy «Járdem-Vet» oqý-ǵylymı-óndiristik ortalyǵyna ornalastyryldy.
«Járdem-Vet» oqý-ǵylymı-óndiristik ortalyǵynyń meńgerýshisi Bekjasar Sıdıhovtyń málim etkenindeı, qazir munda saıajaılardan jetkizilgen 102 ıt ustalýda.
Bekjasar Mustaqapulynyń sózine qaraǵanda, negizinen qaladaǵy buralqy ıtterdi sterılızatsııalaý, enin alyp tastaý, degelmentızatsııalaý, egý jáne birdeılendirýge arnalǵan atalmysh ortalyq 75 orynǵa eseptelgen.
«Qazirgi kezde sý tasqynyna baılanysty biz ár kletkada eki-úsh ıtten ustap otyrmyz. Olardy asyrap, tamaqtandyramyz, astyn tazalaımyz. Ózimizdegi tamaqtyń qoryn paıdalanýdamyz. Ieleri habarlasyp, birer aptada aǵaıyndarymyzǵa alyp ketemiz, aýylǵa aparamyz dep jatqandar bar. BQO veterınarııa basqarmasy, Oral qalalyq veterınarııalyq stantsııasy, eriktilermen, qoǵamdyq uıymdarmen birlesip jumys atqarýdamyz», deıdi B.Sıdıhov.
Onyń aıtýynsha, ıtter qaladaǵy 1, 2, 3-saıajaılardan, teleortalyq mańynan jáne «Stenovık» baý-baqsha seriktestiginen ákelingen.
«Itter ózderiniń basyna túsken jaǵdaıdy sezinetin sııaqty. Ár kletkada eki-úshten otyrsa da, bir-birimen qyrylyspaıdy, tynysh. Iesi vıdeodaýyspen qońyraý shalǵan kezde sony estip, tanyp jatqandar da bar. Munda haskı, tazy, alabaı, nemis ovcharkasy tuqymdas ıtter de ornalastyrylǵan», dedi B.Sıdıhov.
Eske sala keteıik, budan buryn Jaıyq ózenindegi sý deńgeıi Oral qalasy tusynda 864 santımetrdi kórsetkenin jazǵan bolatynbyz.
