Sý tasqyny: Oralda polıtseıler shatyrdaǵy saıajaı turǵynyn qutqardy

ORAL. KAZINFORM – Oral qalasynda úıi sýǵa ketip, shatyr ústine shyqqan saıajaı turǵyny qutqaryldy. 

BQO polıtsııa departamentiniń baspasóz qyzmetiniń málimetinshe, oqıǵa «Vympel» saıajaı qoǵamynda bolǵan. 

Qas-qaǵymda úıi sýǵa ketip, ózi áýpirimdep shatyrǵa kóterilgen turǵyn saıajaı qoǵamynyń tóraǵasyna habarlasady. Tóraǵa osy aýmaqqa jaýapty Shaǵan polıtsııa bólimi jergilikti polıtsııa qyzmeti bólimshesiniń № 21 ýchaskelik polıtsııa pýnktiniń aǵa ýchaskelik polıtsııa ınspektory, polıtsııa kapıtany Dıdar Ótepovke habar beredi. 

«D.Ótepov tótenshe jaǵdaı týraly basshylyqqa aıtyp, ózi oqıǵa ornyna attanady. Polıtsııa qyzmetkerleri qalalyq tótenshe jaǵdaılar basqarmasyna da dereý málimet jiberedi. Tártip saqshylary áýeli er adamdy úıdiń shatyrynan túsirip, sosyn qaıyqqa otyrǵyzyp, jaǵalaýǵa shyǵardy. Sodan keıin Derkól kentindegi evakýatsııalaý pýnktine jetkizip, qaýipsiz jerge ornalastyrdy. Qala turǵyny Shaǵan polıtsııa bóliminiń qyzmetkerlerine, qalalyq tótenshe jaǵdaılar basqarmasynyń qutqarýshylaryna alǵysyn jetkizip, jumystaryna sáttilik tiledi», - dep habarlady vedomstvodan. 

Anyqtalǵanyndaı, er adam eki kún boıy saıajaıda bolǵan. Keıin onyń telefonynyń qýaty taýsylyp, jubaıy dabyl qaqqan. Abyroı bolǵanda, bári sátti aıaqtaldy. 

«Bizdiń kúshimiz – birlikte. Osyndaı ýaqytsha qıyndyqtarǵa tótep berý úshin judyryqtaı jumylýymyz kerek. Bul – bizdiń halyq aldyndaǵy mindetimiz», - dedi polıtsııa kapıtany Dıdar Ótepov. 

Aıta ketsek, batys Qazaqstan oblysy boıynsha sý tasqynyna qarsy is-sharalarǵa 700-den astam polıtsııa qyzmetkeri 104 tehnıkamen qatysyp jatyr.

Eske sala keteıik, budan buryn Oral qalasynda zardap shekken turǵyndardan ótinish qabyldaý bastalǵanyn habarlaǵan bolatynbyz. Sondaı-aq Batys Qazaqstanda 7 myńdaı adam evakýatsııalandy.