Sý tasqyny: Oral qalasynda 1957 jylǵy jaǵdaı qaıtalanýy múmkin
ORAL. KAZINFORM — Jaıyq ózenindegi sý deńgeıi Oral qalasy tusynda 10 metrge (qaýipti shegi – 850 sm) deıin kóterilýi múmkin.
Oral qalasy ákiminiń orynbasary Jandos Dúısenǵalıevtiń málim etkenindeı, Jaıyqtyń qalypty deńgeıi 22 metr 46 santımetr bolsa, mamandardyń boljamyna qaraǵanda, oǵan taǵy 10 metr qosylýy yqtımal, sonda 33 metrge jýyqtamaq.
Jandos Ashatulynyń sózine qaraǵanda, osyndaı jaǵdaı Oralda 1957 jyly tirkelgen (onda sý deńgeıi 933 santımetrge jetken). Sol kezde qalanyń ortalyq kóshesi – qazirgi N.Nazarbaev dańǵyly ıÝbıleınyı aıaldamasy tusynda turǵyndar tizege deıin sý keshken.
«Árıne, odan beri dambylar salyndy. Olar sý 33 metrge kóterilgen jaǵdaıda tótep beredi. Degenmen Jaıyq jáne Shaǵan ózeni jaǵalaýyndaǵy dambylardy taǵy bir metrdeı bıiktetip, nyǵyzdaý jumystary júrgizilýde. Buǵan óńirdegi 20-dan astam iri kompanııanyń 200-ge jýyq arnaıy tehnıkasy tartyldy. Olar kúndiz-túni, eki aýysymda jumys jasaıtyn bolady. Jaıyqtaǵy sý deńgeıi 15-20 sáýir aralyǵynda qatty kóteriledi dep otyrmyz. Soǵan deıin tıisti jumystardy atqaryp úlgerýimiz kerek», - dedi J.Dúısenǵalıev.
Onyń aıtýynsha, qalada 125 baý-baqsha seriktestigi bolsa, sonyń 55-i Jaıyq ózeni jaıylmalarynda ornalasqan. Bularda 10 myńnan astam adam turady.
«Biz osy kezge deıin saıajaılarǵa barynsha kómektesip, 100 myń qap bóldik. Endi mundaı jumystar toqtatylyp, saıajaılarda turatyndar kóshiriledi. Aldaǵy aptanyń seısenbi kúninen bastap evakýatsııalaýdy eshqandaı kedergisiz júrgizý úshin «Azamattyq qorǵaý týraly» Zańynyń 56-babyna (tótenshe jaǵdaılardy joıý kezindegi avarııalyq-qutqarý jumystary men kezek kúttirmeıtin jumystar) sáıkes qaýipti aýmaqtaǵy saıajaılardy elektr jáne gaz jelilerinen ajyratý jumystaryn bastaımyz. Eger transformator qosýly bolyp, sýǵa ketse, sondaǵy turǵyndardyń bárine qaýip tónedi», - dedi J.Dúısenǵalıev.
«Qazgıdromet» RMK BQO fılıalynyń 6 sáýir saǵat 16.00-degi málimeti boıynsha Jaıyq ózeniniń deńgeıi Oral qalasy gıdrobeketinde 688 santımetrge jetip tur.
Eske sala keteıik, budan buryn Batys Qazaqstan oblysynda sýǵa ketken 552 úıdiń 292-si jaramsyz ekenin jazǵan bolatynbyz. Sondaı-aq Jaıyq ózeniniń deńgeıi Oral qalasy tusynda 685 santımetrge jetti.
