Sý tasqyny: óńirlerde 20 myńnan astam volonter jumys istep jatyr
ASTANA. KAZINFORM – Ulttyq volonterler jelisi jedel shtabynyń jumysy aıasynda elimizdegi 20 aımaqtyń árqaısysynda óńirlik volonterler front-keńsesi bazasynda call center quryldy. Bul týraly Mádenıet jáne aqparat mınıstrligi málimdedi.
Zardap shekkenderge kómek kórsetip, volonterlerdi bólýdi úılestirý úshin biryńǵaı baılanys nómiri +7 708 706 4242 jumys istep tur.
Aqtóbe oblysy
Óńirde 4 myńǵa jýyq volonterlyq toptyń qatysýymen sý tasqynyna qarsy belsendi is-sharalar jalǵasyp jatyr.
Búginde olar sý basqan úılerden 2 myńnan astam turǵyndy qajetti kerek-jaraqpen birge evakýatsııalaýǵa kómek kórsetti, erikti taksı júrgizýshileri turǵyndardy evakýatsııalyq pýnktterge tegin tasymaldady. Sý tasqynynan zardap shekkenderge kómek jınaý júrip jatyr. Sońǵy táýlikte eriktiler 6000 adamǵa ystyq tamaq taratty. Jumys áli de jalǵasyp jatyr.
Aqmola oblysy
Sý tasqynyna qarsy is-sharalarǵa 200-den astam volonter qatysyp, zardap shekken 500-den astam azamatqa kómek kórsetildi. Sý basqan aýmaqtardyń turǵyndaryn evakýatsııalaý, TJD, basqa da qutqarýshy qyzmetkerlerge ystyq shaı men tamaq uıymdastyryldy. Kókshetaý qalasynda kóktemgi sý tasqynynan zardap shekkenderge kómek kórsetý úshin, qajetti zattardy qabyldaý pýnktteri ashyldy.
Batys Qazaqstan oblysy
300-ge jýyq volonter TJD qyzmetkerlerimen birlesip, sý tasqynyna qarsy is-sharalarǵa qatysyp, evakýatsııalanǵan turǵyndarǵa jatyn oryndarymen jáne azyq-túlikpen qamtamasyz etip jatyr.
Qostanaı oblysy
Eldi mekenderde 600 adamǵa ystyq tamaq uıymdastyryldy. Joǵary oqý oryndary men kolledj stýdentterin qosa eseptegende 200 volonter turǵyn úılerden sý shyǵaryp, turǵyndardy qaýipti jerlerden evakýatsııalyq pýnktterge jetkizip, azyq-túlik ónimderin tasymaldaý jumystaryn jasady.
Jalpy, eldegi aımaqtarda zardap shekkenderge kómek jınaý pýnktterine 20000 volonter jumyldyryldy. Sońǵy aqparat boıynsha 12 701 adam, onyń ishinde 4 728 bala evakýatsııalandy. Ýaqytsha qonystaný pýnktterinde 6 461 adam, onyń ishinde 2 570 bala bar. Tótenshe jaǵdaı bastalǵannan beri 4,2 mln m³-tan astam erigen sý soryldy.
