Sý tasqyny kezinde aqtóbelik dárigerler turǵyndarǵa qalaı kómek kórsetti
AQTÓBE. KAZINFORM – Sý tasqyny kezinde Aqtóbe oblysy boıynsha psıhologııalyq kómek kórsetetin jedel jeli iske qosyldy. Sonymen birge qutqarý, evakýatsııalyq pýnktterdegi adamdarǵa medtsınalyq kómek kórsetý jumystarynyń bárinde aq halattylar qatar júrdi.
Medıtsınalyq-psıhologııalyq kómek
Aqtóbe oblysy boıynsha 132 adam psıhologııalyq kómek berý jelisine qońyraý shalǵan. Oblystyq densaýlyq saqtaý basqarmasy baspasóz qyzmetiniń habarlaýynsha, onyń 113-i aqparat alsa, 18-i shyn máninde psıhologııalyq kómekke muqtaj boldy. Qazir óńirde barlyǵy 23 psıholog sý tasqyny kezinde qaýipsiz jerge kóshirilgen adamdarǵa kómek kórsetip júr.
- Qazir oblysta 20 evakýatsııalyq beket bolsa, olardyń árqaısysynda psıhologtar, dárigerler jumys isteıdi. Sonymen birge jedel járdem kezekshiligi de bar. Barlyǵy 18 tehnıka, 58 medıtsına qyzmetkeri osy jumysty atqaryp júr. Ólim-jitim tirkelmedi. Júkti kelinshekter men balalardyń densaýlyǵy qalypty. Yrǵyz aýdanynda egiz qyz aman-esen dúnıege keldi. Olar tikushaqpen aýdan ortalyǵyna jetkizildi,- dep habarlady Aqtóbe oblystyq Densaýlyq saqtaý basqarmasynyń baspasóz qyzmeti.
Qan qysymy kóterilip, sýyq tıdi
Sý tasqyny kezinde Aqtóbe oblysy boıynsha aýqymdy evakýatsııa jumysy Oıyl aýdanynda júrdi. Munda aýdannyń barlyq medıtsına qyzmetkeri jumyldyryldy. Sonymen birge oblys ortalyǵynan pýlmonolog, balalar dárigeri, hırýrg pen psıhologtar quralǵan 4 maman shaqyryldy.
- Aýdandaǵy mektep-gımnatsııa, sport mektebi, kolledj jataqhanasynda evakýatsııalyq pýnkt bar. Onda sý tasqyny kezinde úsh brıgada jumys istedi. Jedel medıtsınalyq kómekpen qatar psıhologtar keńes berdi. Eń aldymen salqyn sýdan balalarǵa sýyq tıip qaldy. Negizi júkti kelinshekter men balalardyń kóbi kúni buryn evakýatsııalandy. Degenmen sý ortasyndaǵy aýylda qalǵan adamdar qutqarylyp, kómekke júgingender boldy,- dedi Oıyl aýdandyq aýrýhanasynyń bas dárigeri Sándibek Nurbaev.
Onyń aıtýynsha, tasqyn kezinde medtsına qyzmetkerleri tikushaqtan kútip alyp, kómek berý qyzmetin atqarǵan. Sebebi aýdan ortalyǵyna jetkizilgen adamdar arasynda ústi-basy sý bolǵan adamdar da boldy.
- Qazir bári turaqty. Onshaqty adam aýrýhanaǵa jatqyzyldy. Biriniń qan qysymy kóterildi, ekinshisine sýyq tıdi. Jaraqat alǵan eshkim joq. Qazir evakýatsııalyq pýnktterde bizdiń qyzmetkerler áli de bar. Ol jerlerge táýlik boıy kezekshilik qoıyldy. Dári-dármegin beredi, psıhologııalyq kómek kórsetedi,- dedi Sándibek Nurbaev.
Bul aýdandaǵy Ekpetal aýylynyń ambýlatorııasy jaramsyz kúıge tússe, Qaratal aýylyndaǵy emdeý ornyna sý kirgen.
Qaladaǵy evakýatsııalyq pýnktterde dárigerler kúni-túni jumys isteıdi
Qazir de Aqtóbe qalasyndaǵy evakýatsııalyq pýnktterde kezekshilik bar. Onda mektep meıirbıkeleri men psıhologtar, dáriger júr.
- №31 qazaq orta mektebinde naýryzdan bastap kezekshilikke shyǵyp júrmiz. Balalarǵa sýyq tıip aýyrǵan kez boldy. Syryly ulǵaıyp, demikken kezde jedel járdem shaqyryp, aýrýhanaǵa jiberdik. Negizi biz balalardy, adamdardy baqylap, tekserip júremiz, - dedi №2 emhananyń mektep dárigeri Ásel Shýkenova.
Sonymen birge tótenshe jaǵdaı kezinde oblystyq perınataldyq ortalyqta 177 sábı ómirge keldi. Onyń 99-y qyz, ózgesi ul.
- Úsh sábı sý tasqyny qaýpi tóngen aýyldan boldy. Sondyqtan olardyń perzanthanada uzaq ýaqyt jatýyna múmkindik jasaldy. Negizi aýdan, aýyldan júkti kelinshekterdi tasymaldaýda esh qıyndyq bolmady. Aqtóbe oblystyq densaýlyq saqtaý basqarmasy aldyn ala qamdanyp, evakýatsııalady. Yrǵyz aýdanynda egizder ómirge kelgeni belgini. Onda brıgada jiberilgenimen, jolda jergilikti dáriger bosandyryp aldy. Qazir ana men balanyń densaýlyǵy jaqsy,- dedi Aqtóbe oblystyq perınataldyq ortalyq bas dárigeriniń orynbasary Andreı Gaıdaı.
