Sý tasqyny bolǵan óńirlerge 3 myńǵa jýyq medıtsına mamany jumyldyrylǵan
ASTANA. KAZINFORM — Memleket basshysy osy qıyn-qystaý kezde ýaqytsha synaqtardy eńserý úshin qoǵamdy biriktirip, birge kúsh jumyldyrýǵa shaqyrdy. Densaýlyq saqtaý salasy mamandary da sanıtarlyq-gıgıenalyq jáne epıdemııaǵa qarsy sharalar keshenin júrgizý maqsatynda sý tasqynynan zardap shekken aımaqtarda eńbektenip jatyr.
Medıtsına qyzmetkerleri de qutqarýshylar men ózge de shuǵyl qyzmetter sııaqty muqtaj jandarǵa úzdiksiz medıtsınalyq kómek kórsetý úshin kúsheıtilgen rejımde jumys istep jatyr.
«Osynaý qıyn kezeńde jergilikti tótenshe jaǵdaı jarııalanǵan on óńirde 3 myńǵa jýyq medıtsına qyzmetkeri ózderiniń eń mańyzdy mıssııasyn — azamattarǵa medıtsınalyq kómek kórsetýdi ári olardyń densaýlyǵyn saqtaýdy jalǵastyryp jatqanyn erekshe atap ótkim keledi. Sý basqan aýmaqtarda 300-ge jýyq jedel medıtsınalyq brıgada jumys istep jatyr», — dedi Densaýlyq saqtaý mınıstri Aqmaral Álnazarova.
Tótenshe jaǵdaılarda medıtsınalyq uıymdar táýlik boıy jumys isteıdi, árbir naýqasqa qajetti medıtsınalyq kómek kórsetilip, dárigerler tarapynan qoldaý kórsetiledi. Kúızelis, qobaljý jáne mazasyzdanǵan turǵyndar arnaıy mamandardan bilikti psıhologııalyq kómekke júgine alady.
Sanıtarlyq-gıgıenalyq jáne epıdemııaǵa qarsy sharalar keshenin júrgizýge 900-ge jýyq maman jumyldyrylǵan. Densaýlyq saqtaý mınıstrligi on óńirde halyqtyń densaýlyǵyn saqtaý máselesin, onyń ishinde dári-dármekpen jáne medıtsınalyq maqsattaǵy buıymdarmen qamtamasyz etý máselesin turaqty baqylaýda ustap, júkti áıelderdiń, balalar men qarttardyń jaǵdaıyna erekshe nazarda.
