Sý tasqyny: BQO turǵyny aýdan ákimdigin sotta jeńip shyqty

ORAL. KAZINFORM — Syrym aýdany ortalyǵy Jympıty aýylynyń turǵyny Aıjan Ertaeva ótken jylǵy tasqyn sýdan zardap shekken edi.

Zańger, BQO qoǵamdyq keńesiniń múshesi Baýyrjan Ahmetjannyń Facebook áleýmettik jelisindegi paraqshasynda málim etkenindeı, A.Ertaeva 2017 jyldan beri Jympıty aýyly S.Seıfýllın kóshesindegi 2-úı 2-páterde turǵan. 

Úıi sýǵa ketkennen keıin ótken jyly 3 sáýirde «Daýymshar» JShS tehnıkalyq zertteý júrgizip, páterdi ári qaraı paıdalanýǵa bolady, jóndeý kerek dep qorytyndy bergen. 

B.Ahmetjannyń sózine qaraǵanda, sol jyly 8 mamyrda «Qýatov Erjan» JK múlikke keltirilgen zııandy 2 mln 194,588 myń teńge dep baǵalaǵan. 

Alaıda A.Ertaeva munymen kelispeı, 24 mamyrda shyǵyn qaıta eseptelip, ákimdik jóndeýge 5 mln 672,234 myń teńge bergen. Maýsym-shildede jubaıy ekeýi osy qarjyǵa jóndeý jasaǵan. 

- Áıtse de 26 tamyzda «Qalıev Abat» JK qaıtadan tehnıkalyq zertteý júrgizip, úıdi paıdalaný qaýipti, jóndeý orynsyz, apatty jaǵdaıdaǵy ǵımarat buzylýǵa jatady, dep qorytyndy bergen. ıAǵnı 3 aı 2 kúnnen keıin ákimdik qaıtadan komıssııa joldap, basqa sheshimge kelgen. 10 qyrkúıekte eski baspana buzylyp, 28 jeltoqsanda otbasy jańa páterge kirdi, - deıdi zańger. 

Biraq is munymen bitpeı, aýdan ákimdigi sotqa berip, Syrym aýdandyq sotynyń bıylǵy 11 naýryzdaǵy sheshimimen (sýdıa Marına Sahıpova) A.Ertaevadan 5,6 mln teńge óndirilgen. 

- Budan keıin ádildik izdegen turǵyn oblystyq sotqa apellıatsııalyq shaǵym berýge májbúr boldy. Búgin oblystyq sottyń sýdıasy Tursyn Orazova isti tolyq, jan-jaqty qarap, ádil sheshim shyǵardy. Aýdandyq sottyń sheshimi buzylyp, 5,6 mln teńge óndirý negizsiz dep tabyldy. Aıjan Ertaevadan 5,6 mln teńgeniń ishinen tek is júzinde paıdalanylmaǵan 1,5 mln teńge ǵana óndirildi, - dedi B.Ahmetjan. 

Eske sala keteıik, budan buryn sý tasqynyna baılanysty Oralda sot qala ákimin komıssııa sheshimin qaıta qaraýǵa mindettegenin jazǵan edik.